चितवन, २२ पौष। मोटरसाइकल चोरिमा संलग्न चार जनालाई चितवन प्रहरीले पक्राउ गरेको छ। जिल्ला प्रहरी कार्यालय चितवनले बुधबार पत्रकार सम्मेलन गरी पक्राउ परेका चारै जनालाई सार्वजनिक गरेको हो । पक्राउ पर्नेहरुमा भरतपुर महानगरपालिका वडा नम्बर ९ शरदपुर बस्ने वर्ष २१ का मेलोन सुनार, वडा नम्बर ११ गणेशस्थान बस्ने वर्ष १८ का शिव बिक, वडा नम्बर ८ गौरीगञ्ज बस्ने वर्ष २८ का सन्त कुमार गुरुङ र गोरखाको भिमसेन थापा गाउँपालिका वडा नम्बर ५ घर भइ हाल भरतपुर महानगरपालिका वडा नम्बर ८ पारसनगर जानकीटोल बस्ने वर्ष ३७ का नवराज श्रेष्ठ रहेको जिल्ला प्रहरी कार्यालय चितवनका प्रमुख प्रहरी उपरीक्षक नान्तीराज गुरुङले जानकारी दिए । गत पुष २० गते भरतपुर महानगरपालिका वडा नम्बर १० स्थित अस्टभुजा पेट्रोलपम्प पछाडीबाट प्रदेश नम्बर २–०३–००१ प १८७४ नम्बर प्लेट लगाएको २२० सि.सि. को पल्सर सहित मेलोन सुनारलाई पक्राउ गरिएको पछि थप अनुसन्धानको क्रममा अन्य ३ जनालाई पक्राउ गरिएको प्रहरी प्रमुख गुरुङले जानकारी दिए । उनीहरुको साथबाट प्रदेश नम्बर २–०३–००१ प १८७४ नम्बर प्लेट लगाएको २२० सि. सि. को पल्सर, ना ५७ प को १५० सि.सि.को पल्सर मोटरसाइकल, ना ४९ प ५०६५ नम्बरको स्कुटर र प्रदेश नम्बर ३–०२–०१२ प ९९६४ नम्बरको २२० सि.सि.को मोटरसाईकल बरामद भएको प्रहरीले जनाएको छ । उनीहरुलाई चितवन जिल्ला अदालतबाट पुष २० गते बाट लागु हुने गरि ७ दिनको म्याद थप गरी अनुसन्धान भइरहेको छ।
