चितवन, नारायणगढ असार २० (शनिबार) — चितवनको नारायणगढ बजार शनिबार पूर्णरूपमा सञ्चालनमा आएको देखिएको छ। केही समयअघि शनिबारलाई साप्ताहिक बजार बिदा बनाउने विषयमा चर्चा भए पनि आज अधिकांश पसल नियमित रूपमा खुलेका छन्।
चितवन को फेन्सि तथा कपडा व्यवसायी सङ्घ, हरुले भने व्यावसायिक दृष्टिले सोमबारलाई नै साप्ताहिक बजार बिदाको रूपमा कायम राख्नुपर्ने अडान दोहोर्याउँदै आएको छ। सङ्घका अनुसार सोमबार बजार बन्द गर्दा व्यवसाय सञ्चालन, ग्राहकको चाप व्यवस्थापन तथा व्यवसायीहरूको हितमा उपयुक्त हुने निष्कर्षमा पुगिएको छ।
यता, चितवन उद्योग वाणिज्य सङ्घले शनिबारलाई बजार बिदा दिने निर्णय सार्वजनिक गरेको भए पनि त्यसको प्रभाव नारायणगढ बजारमा खासै देखिएन। शनिबार अधिकांश अन्य बस्तुगत ब्यबसायी हरु सहित फेन्सी तथा कपडा पसलहरू नियमित रूपमा सञ्चालनमा रहे।
फेन्सी तथा कपडा व्यवसायीहरूले भने आफ्नै पेशागत सङ्घको निर्णयप्रति एकबद्धता जनाउँदै पुरानै व्यवस्था अनुसार सोमबार नै बजार बन्द गर्ने निर्णयलाई निरन्तरता दिएका छन्। व्यवसायीहरूका अनुसार यस विषयमा एकरूपता कायम गर्दै व्यवसायीहरूको साझा हितलाई प्राथमिकता दिइनेछ।
व्यवसायीहरूबीच साप्ताहिक बजार बिदाको दिनलाई लिएर फरक–फरक धारणा देखिए पनि नारायणगढ क्षेत्रमा शनिबार बजार पूर्णरूपमा खुलेपछि पुरानै व्यवस्था कायम रहने संकेत देखिएको स्थानीय व्यवसायीहरूको भनाइ छ।
