चितवन । चितवनका दुई चर्चित तेक्वान्दो खेलाडी उमर खाना र मेलिना पन्तको वास्तविक प्रेम कहानीमा आधारित ‘मनको धनी’ गीत सार्वजनिक भएको छ । यी प्रेम जोडी खेलमा मात्र होईन्, अभिनयमा समेत अब्बल रहेको गीतको भिडियोमा देख्न पाईन्छ । हिन्दु र मुस्लिम धर्मबीच प्रेममा देखिने समस्यालाई गीतका चर्चीत संगीतकार अर्जुन पोखरेलले आफ्नै शब्द, संगीत र निर्देशन रहेको छ।
गीतको कथा वस्तु निकै रोचक तरिकाबाट प्रस्तुत गरिएको छ । दुई फरक धर्म मान्ने परिवारले स्वीकार नगरेपछि उनीहरुबाट जन्मिएको सन्तानले धर्मप्रति राखेको प्रश्न साँच्चै सुन्दर पक्ष रहेको छ । गीतमा चितवनका युवा पत्रकार राजेन्द्र आचार्यले समेत छोटो अभिनयमार्फत सिने जगतमा प्रवेश गरेका छन् । वडा अध्यक्षको भूमिकामा आचार्य अभिनय सशक्त रुपमा देख्न सकिन्छ ।
चितवनको रत्ननगर निवासी चर्चीत संगीतकार पोखरेल अब संगीतामा मात्रै होईन् निर्देशनमा समेत अब्बल सावित बन्दै चितवनका मनोरम दृश्यलाई कैद गर्न सफल देखिएका छन् । पर्यटकीय नगरी सौराहादेखि उपरदङगढीसम्मको दृश्य गीतको भिडियोमा देख्न सकिन्छ । गीतमा गायिका दुर्गा खरेल, गायक साईराज खाती र गायिका अनुजा कडरियाको स्वर रहेको छ ।
आफुले धर्म, जात र धनसम्पत्ति भन्दा माथि मानवता भन्ने भाव देखाउन गीतको रचना गर्दै भिडियोमार्फत वास्तविक काहानी प्रस्तुत गरेको पोखरेलको भनाई छ । गीतको छायांकन नवराज उप्रेती र सम्पादन विकास दाहालको रहेको छ, भने भिडियो डिभाईन म्यूजिकको युटयुब ज्यानल मार्फत सार्वजनिक गरिएको छ ।
