मङ्सिर ११, काठमाडौं ।लन्डन । बेलायतमा पछिल्ला दिनहरूमा कोरोना सङ्क्रमितको सङ्ख्या बढ्ने क्रम निरन्तर जारी छ । विगत केही दिनयता दैनिक ४० हजारमाथि सङ्क्रमित रहँदै आएकोमा शुक्रवार यो सङ्ख्या ५० हजार नाघेको छ । ‘डिपार्टमेन्ट अफ हेल्थ एण्ड सोशल केयर’ ले सार्वजनिक गरेको शुक्रबारको तथ्यांकअनुसार पछिल्लो २४ घण्टामा ५० हजार ९१ नयाँ सङ्क्रमित फेला परेका छन् । यससँगै बेलायतमा कुल सङ्क्रमितको सङ्ख्या एक करोड ७० हजार ८४१ पुगेको छ ।
पछिल्लो पटक अहिलेसम्मकै घातक भनिएको नयाँ कोभिड भेरिएन्टको सङ्क्रमण बढ्दै गएपछि सतर्कता अपनाउन वैज्ञानिकहरूले चेतावनी दिएका छन् । सर्वप्रथम बोत्स्वाना, साउथ अफ्रिका र हङकङमा फेला परेको यो नयाँ भाइरस अहिले इजिप्टबाट बेल्जियम आएका व्यक्तिमा समेत देखिएको छ, जसले कोरोनाविरुद्धको खोप लगाएका थिएनन् । सङ्क्रमण नियन्त्रण गर्ने क्रममा बेलायतले नामिबिया, जाम्बिया,लेसोथो,एस्वाटिनी लगायतका छ वटा मुलुकलाई आइतबार बिहान ४ बजेबाट यात्रा प्रतिबन्धको रेड लिष्टको सूचीमा राखेको छ ।
सरकारले बेलायतमा सतर्कता अपनाउनुपर्ने भन्दै खोपलाई अझ तीव्रता दिने बताएको छ । बेलायती स्वास्थ्य मन्त्री साजिद जाविदले यो अन्तर्राष्ट्रिय चासोको विषय रहेको बताएका छन् । यसैगरी कोरोनाका कारण बितेको २४ घण्टामा १६ जनाको मात्र गएको स्वास्थ्य विभागले जनाएको छ । पछिल्लो एक सातामा बेलायतमा ८७७ जना सङ्क्रमितको ज्यान गएको छ । यससँगै बेलायतमा हालसम्म कोरोनाका कारण ज्यान गुमाउनेको सङ्ख्या एक लाख ४४ हजार ५९३ पुगेको छ । बेलायतमा अहिले २९.२ प्रतिशतले कोरोनाविरुद्धको खोपको तेस्रो अर्थात् बुष्टर डोज लगाइसकेको सरकारी तथ्याङ्कमा उल्लेख छ । शुक्रबारसम्मको तथ्याङ्क अनुसार यहाँ एक करोड ६७ लाख ७९ हजार ६५६ जनाले उक्त बुष्टर डोज लिइसकेका छन् । पछिल्लो २४ घण्टामा तीन लाख ९६ हजार भन्दा बढीले बुष्टर डोज लगाएका छन् । यसैगरी पाँच करोड ८ लाख ७५ हजार जना अर्थात् ८८.५ प्रतिशतले खोपको पहिलो डोज र ४ करोड ६२ लाख ५५ हजार ८१ जना अर्थात् ८०.४ प्रतिशतले खोपको दुवै डोज लगाइसकेको तथ्याङ्कमा उल्लेख छ ।
