मङ्सिर ०९, काठमाडौं ।‘छ माया छपक्कै’ जस्तो सुपरहिट फिल्मका निर्देशक दीपेन्द्र लामाले फिल्म क्षेत्रमा कलाकारहरुको एकदमै अभाव रहेको बताएका छन् । फिल्म क्षेत्रमा कलाकारको ‘रेन्ज’ बढाउन नयाँ अनुहारको आगमन आवश्यक रहेको उनको भनाई छ । आफ्ना तीन फिल्म ‘घामपानी, गोपी र छ माया छपक्कै’ मा चलेका कलाकारसँग काम गरेका उनी नयाँ कलाकारलाई पनि ब्रेक दिनुपर्ने बताउँछन् ।
आफ्नो नयाँ फिल्म ‘घुइँचो’ बाट कुन्साङ बोम्जनलाई नायकको रुपमा डेब्यू गराउन लागेका उनले सोमवार यही फिल्मको घोषणा सभामा भने- ‘अहिले हामीकहाँ कलाकारको अभाव छ । दयाहाङ राई, सौगात मल्ल, अनमोल केसी, प्रदीप खड्का लगायतका कलाकारले डेट नदिए उहाँहरुको विकल्प छैन । त्यसैले कलाकारको रेन्ज बढाउन पनि नयाँ अनुहारको आगमन आवश्यक छ ।’ फिल्म ‘घामपानी’ बाट निर्देशनमा डेब्यू गरेका लामाले डेब्यू पाउनु हरेक मानिसका लागि ठूलो अवसर रहेको बताए । उनी अगाडि भन्छन्, ‘कसै न कसैलाई हामीले ब्रेक दिनुपर्छ ।
कुन्साङलाई हामीले डेब्यू गराउन पायौं त्यो हाम्रो लागि खुसीको कुरा हो । यसमा कुन्साङले आफ्नो प्रतिभा पोख्न सक्नुभयो भने उहाँ अरुको नजरमा पनि पर्न सक्नुहुन्छ र इन्डस्ट्रीले पनि नयाँ अनुहार पाउनेछ ।’ रोचक कुरा के भने ‘घुइँचो’ मा कलाकार फाइनल भइसकेपछि दीपेन्द्र लामा अनुबन्ध भएका हुन् । संसारमा निर्देशकभन्दा अगाडि फिल्ममा कलाकार फाइनल भएका घट्ना कमै छन् । यसबारेमा लामा भन्छन्, ‘यो सोच्दा अनौठो लाग्न सक्छ । तर, फिल्ममा म आइसकेपछि मेरो कन्सेप्ट अनुसार अगाडि बढ्छ ।’ फिल्मको स्क्रिप्टले आकर्षित गरेपछि आफू आबद्ध भएको उनको भनाई छ ।
