काठमाडौं : रौतहट बम बिस्फोटको अभियोगमा जिल्ला अदालतको आदेशले पुर्पक्षका लागि थुनामा रहेको नेपाली कांग्रेसका निलम्बित सांसद् मोहम्मद अफताव आलमको मुद्दा सुनुवाइ नहुने भएको छ ।
उनको निवेदन न्यायाधीशद्वय प्रकाशमान सिंह राउत र कुमार चुडालको इजलासमा परेको थियो । तर, हेर्न नमिल्नेमा परेको छ । आलामलाई २०७६ माघ २४ गते उच्च अदालत वीरगञ्जले पुर्पक्षका लागि थुनामा पठाउने जिल्ला अदालतको आदेश सदर गरेको थियो । २०७६ कात्तिक २९ गते जिल्ला अदालत रौतहटले उनलाई पुर्पक्षका लागि थुनामा पठाएको थियो ।
२७ चैत २०६४ मा रौतहटमा बम बिस्फोट गराएको र त्यसबाट व्यक्ति हत्या गरेको आरोप लागेर आलम थुनामा छन् । जिल्ला अदालत रौतहटले थुनामा पठाएको आदेशविरुद्ध पुनरावेदन गर्दै आलम उच्च अदालत विरगञ्ज पुगेका थिए । उच्चले जिल्ला अदालतकै आदेश सदर गर्दै थुनामा राख्ने आदेश जारी गरेको थियो ।
त्यही आदेशविरुद्ध आलम सर्वोच्च अदालत पुगेका हुन् ।
