चितवन, माघ ३०।
२०७७ माघ २८ गते नेकपा प्रचण्ड -नेपाल पक्षले काठमाडौँमा आयोजना गरेको विरोध सभामा रघुजी पन्त नामका नेताबाट राष्ट्रदेव पशुपतिनाथ प्रति अभिव्यक्त भनाइप्रति नेपाल सन्त समाजले गम्भीर ध्यानाकर्षण भएको बताएको छ।
समाजका अध्यक्ष स्वामी ज्ञानानन्द सरस्वती एवम् महासचिव डा.गुरुप्रसाद सुवेदीद्वारा हस्ताक्षरित विज्ञप्तिमा नेपालका राष्ट्रदेव पशुपतिनाथप्रति अनास्था जगाउने र सम्पूर्ण नेपालीहरूका आस्थामा चोट पुर्याउने किसिमको अभिव्यक्तिको घोर भर्त्सना गर्दै सार्वजनिक रूपमा यस्ता किसिमका आपत्तिजनक अभिव्यक्ति प्रकट गर्ने जोसुकै व्यक्ति वा राजनीतिक दलको भ्रममा नपर्न समेत अनुरोध गरिएको छ।
विज्ञप्तिमा भनिएको छ”धर्मनिरपेक्षता यहाँको परम्परागत मान्यतालाई समाप्त गर्न र सांस्कृतिकरूपमा नेपाललाई पराधीन बनाउने नियतका साथ घुसाइएको थियो भन्ने कुरा आज स्पस्ट भएको छ”। संविधानमा धर्मनिरपेक्षताको परिभाषाका क्रममा सनातनदेखि चलिआएको धर्मसंस्कृतिको संरक्षण लगायत धार्मिक-सांस्कृतिक स्वतन्त्रता भनिएको भए तापनि अहिलेको घटनाले हिन्दूत्वको आस्थाप्रति कुठाराघात भएको बताउँदै यस्ता अभिव्यक्तिबाट धार्मिक आस्थामाथि चोट पुर्याउँदा सामाजिक ,धार्मिक सहिष्णुतामा खलल पुग्ने हुँदा यस किसिमका अभिव्यक्ति नगर्न र नगराउन अनुरोध गरिएको छ। यस किसिमका अभिव्यक्तिबाट हुने जुनसुकै किसिमको परिणामको जिम्मेवारी सम्बद्ध व्यक्ति ,राजनीतिक दल वा प्रशासनिक निकायले लिनुपर्ने भन्दै सम्बद्ध पक्षलाई समयमै सचेत रहन समाजले आग्रह गरेको छ।
