माघ २७, चितवन । कोरोना भाइरसविरुद्ध नक्कली पिसिआर रिपोर्ट बनाउने दुई जना पक्राउ परेका छन् ।प्रहरीले भरतपुर १३ घर भई देव हस्पिटलका हेल्थ एसिसटेन्ट सन्दिप सापकोटा र चितवनको रत्ननगर नगरपालिका ६ का प्रकाश न्यौपानेलाई पक्राउ गरेको हो । उनीहरुलाई मंगलबार पक्राउ गरिएको जिल्ला प्रहरी कार्यालय चितवनकी प्रहरी निरीक्षक कमला नरालले जानकारी दिईन् ।
पक्राउ परेका सापकोटाले २३ गते शल्यक्रिया गर्नुपर्ने बिरामीको पिसिआर परीक्षणका लागि स्वाब संकलन गरी न्यौपानेलाई दिएका थिए । उनले २४ गते बिरामीलाई दिएको पिसिआर रिपोर्ट नक्कली पाईएको हो ।
नक्कली रिपोर्ट बनाउने न्यौपाने यस अघि भरतपुर अस्पतालको कोरोना परीक्षण प्रयोगशालामा कार्यरत थिए । अहिले भने उनले उक्त प्रयोगशालामा काम छोडिसकेका छन् । तर उनले भरतपुर अस्पतालकै प्रयोगशालाको नाममा नक्कली पिसिआर रिपोर्ट तयार गरेका हुन् । उनले रिपोर्टमा प्रयोगशाला प्रमुख मणी महत्त्वको किर्ते हस्ताक्षर गरेर नक्क्ली रिपोर्ट बनाउँदै पैसा लिने गरेको नरालले जानकारी दिईन् ।
नक्कली पिसिआर रिपोर्ट बनाएको सुचनाको आधारमा उनीहरुलाई पक्राउ गरिएको हो । दुबै जनाविरुद्ध जिल्ला अदालतबाट म्याद थप अनुमति लिई अनुसन्धान भइरहेको छ ।
