माघ १२, काठमाडौं ।फाइजर र बायोएनटेक कम्पनीले कोरोनाको ओमिक्रोन भाइरसका लागि खोप परीक्षण सुरु गरेको छ । ५५ वर्ष उमेर समूहका वयस्कमा ओमिक्रोन केन्द्रित खोपका लागि क्लिनिकल परीक्षण सुरु गरेको कम्पनीले जनाएको छ ।
परीक्षणका क्रममा रोग प्रतिरोधात्मक प्रतिक्रिया केन्द्रमा राखिएको र आउँदो मार्चसम्ममा पहिलो नतिजा निकाल्ने प्रयासमा रहेको फाइजरका कार्यकारी अधिकृत अल्बर्ट बोरलाले बताउनुभएको छ । कम्पनीको खोप अनुसन्धान प्रमुख क्याथ्रिन जानसेनका अनुसार यसअघिका भाइरसका लागि तयार पारिएको बुस्टर मात्राले पनि ओमिक्रोनका कारण देखिन सक्ने गम्भीर खतरालाई टार्न सक्ने अनुसन्धानले पुष्टि गरिसकेको छ । तर यसबाट आउनसक्ने दीर्घकालीन असरबारे अध्ययन थालिएको छ ।
जर्मनी कम्पनी बायोएनटेकका प्रमुख कार्यकारी अधिकृत उगुर साहिनले कोभिडसँग लड्न बनाइएको यसअघिका खोपले ओमिक्रोनविरुद्ध पूर्ण रुपमा काम नगरेको बताएको समाचार संस्था एएफपीले जनाएको छ ।
