मङ्सिर ०९, चितवन। नेपाली कांग्रेसको दसौँ महाधिवेशन नजिकिँदै गर्दा जिल्ला तहमा पार्टीभित्रको चुनावी सरगर्मी पनि तीव्र बन्दै गइरहेको छ। वडादेखि पालिका हुँदै प्रदेश र क्षेत्रको निर्वाचन सम्पन्न गरिसकेको कांग्रेसले यही मंसिर ११ गते जिल्ला तहको नेतृत्व चयन गर्दै छ, जसका लागि उमेदवारी घोषणा गर्नेहरूको चहलपहल पनि बढ्दै गएको छ।
यही क्रममा चितवन जिल्लाको पार्टी उप–सभापति पदका लागि युवा नेता राजेन्द्र डोटेलले उमेदवारी घोषणा गरेका छन्। बुधबार भरतपुरमा पत्रकार सम्मेलन गरेर पार्टी उप–सभापति पदमा चुनाव लड्ने घोषणा गरेका हुन्। नेपाल विद्यार्थी संघको राजनीतिबाट आफूलाई कांग्रेसको राजनीतिमा ल्याएका डोटेलले नेविसंघ चितवनको उपाध्यक्ष, रामपुर क्याम्पसका इकाइ अध्यक्षजस्तो पदमा रहेर काम गरिसकेका छन्।
जिल्लामा युवाको नेतृत्व गर्दै आफूले उमेदावरी दिने निर्णय गरेको उनले बताए। ‘मैले नेविसंघको सदस्यता दिएका २० प्रतिशत क्षेत्रीय प्रतिनिधि आएका छन्,’ उनले भने, ‘उनीहरूको नेतृत्व गर्दै मैले उमेदवारी घोषणा गरेको हुँ।’ २०५४ सालामा नारायणी विद्या मन्दिरबाट राजनैतिक यात्रा सुरू उनले २०५७ सालमा अमृत साइन्स क्याम्पसबाट नेपाल विद्यार्थी संघको सदस्य भएर काम गरे।
कांग्रेसको जनवर्गीय संगठनहरूलाई चलायमान बनाउनका लागि आफूले उमेदवारी दिएको उनको भनाइ छ। पार्टीभित्र समान अधिकार र समान व्यवहारको अभ्यास सिर्जना गर्न पनि आफूले उमेदवारी घोषणा गरेको उनले बताए।
