मङ्सिर ०६, काठमाडौं । भारतले न्यूजील्याण्डविरुद्ध टी-२० सिरिज क्लिन स्वीप गरेको छ।
आइतबार राति सम्पन्न सिरिजको अन्तिम खेल ७३ रनले जितेर सिरिज क्लिन स्वीप गरेको हो। भारतले दिएको १८५ रनको लक्ष्य पछाएको न्यूजील्याण्ड १७.२ ओभरमा १११ रन बनाएर अल आउट भएपछि खेल ७३ रनले गुमाएको हो।
न्यूजिल्याण्डका मार्टिन गप्टिलले ५१ रन बनाए भने टिम सेइफेर्टले १७ र लुकी फर्गुसनले १४ रन बनाए। न्यूजील्याण्डका लागि अन्य ब्याट्सम्यानले दोहोरो अंकमा रन बनाउन असफल भएका थिए।
त्यस्तै भारतका बलर अक्सर पटेलले ३ विकेट लिए भने हर्षल पटेलले २ विकेट लिएका थिए। त्यस्तै दीपक चहर, युजवेन्द्र चहल र वेंकटेश अय्यरले एक एक विकेट लिएका थिए।
यसअघि टस जितेर पहिला ब्याटिंग गरेको भारतले २० ओभरमा ७ विकेट गुमाउदै १८४ रन बनाएको थियो।
भारतका लागि रोहित शर्माले ५६ रन बनाएका थिए भने इशान किशनले २९ रन बनाएका थिए। त्यस्तै श्रेयस अय्यरले २५, वेंकटेश अय्यरले २० रन, दीपक चहरले २१ र हर्षल पटेलले १८ रन बनाएको थिए।
त्यस्तै न्यूजील्याण्डका बलर मिचेल सान्टनरले ३ विकेट लिएका थिए भने ट्रेन्ट बोल्ट, एडम मिल्ने, लुकी फर्गुसन र इश सोढीले एक एक विकेट लिएका थिए।
यो जितपछि भारतले टी-२० सिरिज ३-० ले जितेको छ। भारत भ्रमणमा रहेको न्यूजील्याण्डको क्रिकेट टिमले अब २ खेलको टेस्ट सिरिज खेल्ने छ। सिरिजको पहिलो खेल नोभेम्बर २५ देखि हुने छ।
