कात्तिक १२, चितवन –
स्तन क्यान्सरको समयमै पहिचान र उपचारको महत्त्वबारे जनचेतना फैलाउने उद्देश्यले लायन्स क्लब अफ भरतपुर उज्यालोले ‘पिंक म्याराथन एन्ड जुम्बा’ कार्यक्रम आयोजना गर्ने भएको छ।
कात्तिक १४ गते शनिबार बिहान ५ः३० बजेदेखि सञ्चालन हुने कार्यक्रममा स्तन क्यान्सरसम्बन्धी सचेतना फैलाउनुका साथै शारीरिक व्यायाम र स्वस्थ जीवनशैलीको महत्त्वबारे जानकारी दिईने बताईएको छ ।
कार्यक्रमकी संयोजक सुनिता घिमिरेले स्तन क्यान्सरको समयमै पहिचान र उपचारबारे आम नागरिकलाई सचेत गराउने उद्देश्यले कार्यक्रम आयोजना गर्न लागिएको जानकारी दिनुभयो। उहाँले भन्नुभयो, “स्तन क्यान्सर समयमै पहिचान गर्न सके उपचार प्रभावकारी हुने सम्भावना बढ्छ। यस रोगबारे समाजमा जनचेतना फैलाउने, महिलालाई आफ्नो स्वास्थ्यप्रति सचेत बनाउने र नियमित स्वास्थ्य परीक्षणको महत्त्व बुझाउने उद्देश्यले हामीले ‘पिंक म्याराथन एन्ड जुम्बा’ कार्यक्रम आयोजना गर्न लागेका हौँ।”
घिमिरेका अनुसार कार्यक्रमले स्तन क्यान्सरको प्रारम्भिक लक्षण पहिचान, नियमित स्वास्थ्य परीक्षण र समयमै उपचार गराउनुपर्ने सचेतता एवं सन्देश प्रवाह गर्नेछ। उहाँले स्वास्थ्य सचेतनासँगै शारीरिक सक्रियता बढाउन पनि कार्यक्रमले प्रेरित गर्ने विश्वास व्यक्त गर्नुभयो।
म्याराथन पुल्चोकबाट सुरु भई शहीदचोक, लायन्सचोक हुँदै चौबीसकोठी पुगेर समापन हुनेछ। त्यसपछि साथै चौबीसकोठीमा जुम्बा कार्यक्रम सञ्चालन गरिने आयोजकले जनाएको छ।
कार्यक्रममा स्त्री तथा प्रसूति रोग विशेषज्ञ डा. जेनी नापित र जुम्बा प्रशिक्षक लक्ष्मी भुमीको सहभागिता रहनेछ। स्वास्थ्य सचेतना र शारीरिक सक्रियतालाई जोड दिँदै आयोजना गर्न लागिएको कार्यक्रममा सर्वसाधारणको सहभागिता रहने अपेक्षा गरिएको छ।
‘अर्ली डिटेक्सन सेभ्स लाइभ्स’ अर्थात् समयमै रोग पहिचान गर्दा जीवन बचाउन सकिन्छ भन्ने सन्देशसहित आयोजना हुन लागेको कार्यक्रममा सहभागी भई अभियानलाई सफल बनाउन आयोजकले सबैलाई आग्रह समेत गरेको छ।
‘स्वस्थ समुदाय, उज्ज्वल भविष्य’ भन्ने नारासहित आयोजना हुन लागेको कार्यक्रमले स्तन क्यान्सरसम्बन्धी भ्रम हटाउन, स्वास्थ्य परीक्षणप्रति सचेतना बढाउन र स्वस्थ जीवनशैली प्रवर्द्धन गर्न सहयोग पुग्ने आयोजकको अपेक्षा छ ।
