काठमाडौं । नेपाली कांग्रेसका युवा नेता प्रविन देवकोटाले पार्टीको १५ औं महाधिवेशनमा केन्द्रीय सदस्य पदमा उम्मेदवारी घोषणा गरेका छन्। आइतबार हुने उम्मेदवारको मनोनयन दर्तामा आफूले केन्द्रीय सदस्य पदमा उम्मेदवारी दिन लागेको देवकोटाले जानकारी दिएका छन्।
पार्टीभित्र नयाँ सोच, युवा सहभागिता, प्रविधिमैत्री सङ्गठन र पुस्तान्तरणको एजेन्डासहित चुनावी मैदानमा उत्रिएको उनले बताएका छन्। “राजनीति नारामा मात्र होइन, व्यवहारमा देखिने नयाँ सोच र कार्यशैली हुनुपर्छ,” उनले भने, “अग्रजको अनुभव र युवाको ऊर्जालाई एकै ठाउँमा जोडेर कांग्रेसलाई अझ जीवन्त र जनमुखी बनाउनु हाम्रो मुख्य दायित्व हो।”
यसअघि, नेपाली कांग्रेसको १५औं महाधिवेशनअन्तर्गत चितवन क्षेत्र नं. ३ बाट ३५ वर्षमुनिको युवा क्लस्टरतर्फ देवकोटा भारी मतका साथ केन्द्रीय महाधिवेशन प्रतिनिधिमा निर्वाचित भएका थिए। चितवनको माडी नगरपालिका–४ स्थायी घर भएका उनी माडीबाटै निर्विरोध क्षेत्रीय प्रतिनिधि चुनिएका थिए।
देवकोटासँग दुई दशक लामो लामो साङ्गठनिक अनुभव छ।वि.सं. २०६४ मा नेपाल विद्यार्थी संघ (नेविसंघ)को सदस्यताबाट राजनीतिक यात्रा थालेका उनी खैरहनी माविमा स्कुल कमिटी सचिव, २०७३ मा जिल्ला सदस्य र २०८२ सालदेखि नेविसंघ चितवन जिल्ला सचिवको जिम्मेवारीमा सक्रिय छन्।
पार्टीभित्र युवाको भूमिकालाई सशक्त बनाउने, राष्ट्रियता बलियो तुल्याउने र कांग्रेसलाई प्रविधिमैत्री एवं जनमुखी बनाउने विषयलाई उनले आफ्नो मुख्य एजेन्डा बनाएका छन्।
पेशाले लेखा तथा कर परामर्शदाता रहेका देवकोटा त्रिभुवन विश्वविद्यालयबाट व्यवस्थापन संकायमा स्नातकोत्तर (मास्टर्स) अध्ययनरत छन्।
