भदौ ०२ । बागमती प्रदेश मन्त्रिपरिषदको बैठक सम्पन्न भएको छ । मुख्यमन्त्री डोरमणि पौडेलले मन्त्रिपरिषद बैठकमा आफूले राजीनामा दिने घोषणा गरेका छन् । आफ्नो नेतृत्वमा मन्त्रिपरिषदको यो नै अन्तिम बैठक रहेको जानकारी गराउँदै उनले बैठक लगत्तै प्रदेश प्रमुख कार्यालयमा गएर राजीनामा दिने जानकारी बैठकमा गराएको स्रोतले बतायो ।नेकपा एमालेका प्रमुख सचेतक दिपक निरौलाले पनि मुख्यमन्त्री पौडेलले आजै राजीनामा दिने र सम्भवतः आजै एमाले संसदीय दलको नेता अष्टलक्ष्मी शाक्य मुख्यमन्त्रीमा नियुक्त हुने रातोपाटीलाई बताए ।यसअघि एमाले संसदीय दलको बैठकमा शाक्यलाई संसदीय दलको नेता चयन गरिएको थियो । संसदीय दलको नेता परिवर्तन गरिएकोबारे बुधबार नै प्रदेशसभा सचिवालयलाई जानकारी गराइसकेको प्रमुख सचेतक निरौलाले बताए । एमाले विभाजन भएसँगै बागमती प्रदेशमा माधवकुमार नेपाल पक्षका नेताहरुलाई एमालेभित्रै राख्नका लागि सरकारको नेतृत्व परिवर्तन गर्दै थामथुम पार्न खोजेको हो ।
