चितवन । सेवा र विकासका लागि युवा संस्थाले देशभरका विभिन्न जिल्लाबाट छनोट भएका ३२ जना विद्यार्थीलाई छात्रवृत्ति प्रदान गर्ने भएको छ।
अमेरिकास्थित ओरेगन नेपाली समाजको सहयोगमा सञ्चालन गरिएको छात्रवृत्ति कार्यक्रम अन्तर्गत आर्थिक अवस्था कमजोर भएका विद्यार्थीलाई शैक्षिक सहयोग उपलब्ध गराउन लागिएको हो।
कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका विभिन्न जिल्लाबाट विद्यार्थी छनोट गरिएको संस्थाका केन्द्रीय अध्यक्ष डा. देवेन्द्र कंडेलले जानकारी दिनु भयो।
संस्थाका अनुसार छात्रवृत्ति कार्यक्रमको पाँचौँ चरण अन्तर्गत ३२ जना विद्यार्थीलाई प्रतिव्यक्ति १०० अमेरिकी डलर छात्रवृत्ति रकमसहित प्रमाणपत्र प्रदान गरिनेछ।
शिक्षामा पहुँच विस्तार तथा सामाजिक उत्तरदायित्व अन्तर्गत सञ्चालन गरिएको यस कार्यक्रमले विद्यार्थीको अध्ययनमा सहयोग पुग्ने अपेक्षा गरिएको छ।
आज (शनिवार) आयोजित पत्रकार सम्मेलनमा संस्थाका तर्फबाट केन्द्रीय कोषाध्यक्ष राजु सापकोटा र केन्द्रीय सचिव इन्जिनियर कुशल सापकोटाको समेत उपस्थिति रहेको थियो।
साथै, संस्थाका अनुसार यस वर्ष मात्रै तीन हजारभन्दा बढी विद्यार्थीलाई स्टेसनरी सामग्रीसमेत वितरण गरिएको थियो। विद्यार्थीको शैक्षिक आवश्यकतालाई ध्यानमा राख्दै संस्थाले शिक्षा क्षेत्रमा सहयोगका विभिन्न कार्यक्रम सञ्चालन गर्दै आएको जनाएको छ।
