काठमाडौँ-
सशस्त्र प्रहरी बल (एपीएफ) स्कुल, कीर्तिपुरसँग सम्बन्धित भ्रष्टाचार आरोपको अनुसन्धानका क्रममा लेखा अधिकृत कल्पना गुरुङ र एमडी एडभेन्चर टुर्स एण्ड ट्राभल्सका सञ्चालक लिलाबहादुर तामाङलाई थप १० दिन हिरासतमा राख्न विशेष अदालतले अनुमति दिएको छ।
अख्तियार दुरुपयोग अनुसन्धान आयोगले अनुसन्धानलाई निरन्तरता दिन माग गरेको म्याद थपसम्बन्धी निवेदनका आधारमा विशेष अदालतको इजलासले यस्तो आदेश दिएको हो। न्यायाधीशहरू नारायणप्रसाद पौडेल, हेमन्त रावल र डिल्लीरत्न श्रेष्ठको इजलासले हिरासत अवधि थप गर्ने निर्णय गरेको जनाइएको छ।
आयोगले गुरुङ र तामाङमाथि भ्रष्टाचार निवारण ऐन, २०५९ को दफा ७ र १७ अन्तर्गत अनुसन्धान गरिरहेको छ। उनीहरूलाई अनुसन्धानका लागि अख्तियारमा उपस्थित गराइएपछि थप प्रक्रिया अघि बढाइएको हो।
गत असार २० गते जिल्ला प्रहरी परिसरले दुवै जनालाई नियन्त्रणमा लिएर अनुसन्धान सुरु गरेको थियो। त्यसपछि उनीहरूलाई अदालतबाट पटक-पटक म्याद थप गरिँदै आएको छ। पछिल्लो आदेशसँगै उनीहरूको हिरासत अवधि थप भएको यो पाँचौँ पटक हो।
प्रहरी र सरकारी वकिल कार्यालयको समन्वयमा साउन ८ गते दुवै आरोपीलाई अनुसन्धानका लागि अख्तियार दुरुपयोग अनुसन्धान आयोगमा बुझाइएको थियो। त्यसपछि आयोगले घटनासम्बन्धी प्रमाण संकलन तथा आवश्यक अनुसन्धान प्रक्रिया अघि बढाइरहेको छ।
अदालतको पछिल्लो आदेशपछि आरोपीहरूलाई हिरासतमा राखेर अनुसन्धान जारी राखिएको अख्तियारले जनाएको छ।
