भरतपुर – नेपाल धितोपत्र बोर्ड (सेबोन) बाट ब्रोकर नं. ८० को अनुमति प्राप्त इन्दिरा सेक्युरिटिज प्रालिले चितवनमा आफ्नो शाखा कार्यालय सञ्चालनमा ल्याएको छ। कम्पनीले भरतपुर महानगरपालिका–१०, होटल सिराईचुली अगाडि आफ्नो तेस्रो शाखा कार्यालय स्थापना गर्दै चितवन तथा आसपासका लगानीकर्तालाई प्रत्यक्ष सेवा दिन थालेको हो।
शाखा कार्यालयको उद्घाटन चितवन उद्योग वाणिज्य संघका अध्यक्ष चिरञ्जीवी सुवेदीले गरेका हुन्। उद्घाटन समारोहलाई सम्बोधन गर्दै अध्यक्ष सुवेदीले नेपालमा पूँजी बजारप्रतिको आकर्षण दिनप्रतिदिन बढ्दै गएको उल्लेख गर्दै गुणस्तरीय र भरपर्दो ब्रोकर सेवाको विस्तारले स्थानीय लगानीकर्तालाई ठूलो सहजता पुग्ने विश्वास व्यक्त गरे। उनले चितवनजस्तो आर्थिक तथा व्यापारिक गतिविधिको केन्द्रमा यस्ता वित्तीय सेवाको विस्तार हुनु सकारात्मक कदम भएको बताए।
इन्दिरा सेक्युरिटिजले २०८० सालमा नेपाल धितोपत्र बोर्डबाट ब्रोकर नं. ८० को अनुमति प्राप्त गरी काठमाडौंको सुन्धाराबाट आफ्नो सेवा प्रारम्भ गरेको थियो। छोटो अवधिमै कम्पनीले सेवा विस्तारलाई प्राथमिकतामा राख्दै उपत्यका बाहिर विभिन्न स्थानमा शाखा स्थापना गरेको छ। चितवन शाखासँगै कम्पनीका उपत्यका बाहिर तीनवटा शाखा सञ्चालनमा आएका छन्।
कार्यक्रममा कम्पनीका अध्यक्ष राकेश शिरिषले चितवनमा बढ्दो सेयर लगानीकर्ता तथा पूँजी बजारप्रतिको चासोलाई मध्यनजर गर्दै शाखा विस्तार गरिएको बताए। उनले स्थानीय लगानीकर्ताले अब खाता खोल्ने, डिम्याट तथा मेरो सेयर सम्बन्धी परामर्श, आईपीओ आवेदन, सेयर कारोबार तथा अन्य ब्रोकर सेवा आफ्नै जिल्लाबाट सहज रूपमा प्राप्त गर्न सक्ने जानकारी दिए। आगामी दिनमा अझ आधुनिक, प्रविधिमैत्री तथा ग्राहककेन्द्रित सेवा प्रदान गर्दै देशका विभिन्न भागमा सेवा विस्तार गर्ने कम्पनीको योजना रहेको पनि उनले बताए।
उद्घाटन कार्यक्रममा भरतपुर महानगरपालिका–१० का वडाध्यक्ष परमेश्वर खनालले चितवनमा पूँजी बजारसम्बन्धी सेवा विस्तार हुनु स्थानीय लगानीकर्ताका लागि स्वागतयोग्य भएको उल्लेख गरे। उनले वित्तीय साक्षरता अभिवृद्धि र सुरक्षित लगानी संस्कृतिको विकासमा यस्ता संस्थाले महत्वपूर्ण भूमिका खेल्ने विश्वास व्यक्त गरे।
कार्यक्रममा उद्योगी, व्यवसायी, बैंक तथा वित्तीय संस्थाका प्रतिनिधि, लगानीकर्ता, समाजसेवी तथा विभिन्न क्षेत्रका विशिष्ट व्यक्तिहरूको उल्लेखनीय उपस्थिति रहेको थियो। उपस्थित अतिथिहरूले चितवनमा इन्दिरा सेक्युरिटिजको आगमनले पूँजी बजारसम्बन्धी सेवा थप सहज, प्रभावकारी र पहुँचयोग्य बन्ने अपेक्षा व्यक्त गरेका थिए।
