भरतपुर- बाथरुम फिटिङ्स तथा सेनेटरी वेयरका सामग्री उत्पादन गर्दै आएको स्वदेशी ब्रान्ड एक्वासिटिले आफ्ना देशभरका बिक्रेतालाई एकै थलोमा जोड्ने उद्देश्यका साथ ‘एक्वासिटि पार्टनर्स समिट २०८३’ शुक्रबार चितवनको सौराहामा सम्पन्न गरेको छ।
२०७७ सालदेखि उत्पादन सुरु गरेको एक्वासिटिले छोटो अवधिमै गुणस्तरीय उत्पादन, ग्राहकको विश्वास र प्रभावकारी बजार विस्तारका माध्यमबाट नेपाली बजारमा आफ्नो छुट्टै पहिचान स्थापित गर्न सफल भएको जनाएको छ। कम्पनीले आफ्ना बिक्रेता तथा व्यावसायिक साझेदारहरूसँगको सम्बन्धलाई अझ सुदृढ बनाउने, आगामी रणनीतिबारे छलफल गर्ने तथा अनुभव आदानप्रदान गर्ने उद्देश्यले उक्त समिट आयोजना गरेको हो।
एक्वासिटिका सञ्चालक नारायण पौडेलका अनुसार कार्यक्रममा देशभरका बिक्रेतालाई एउटै मञ्चमा ल्याएर आपसी सम्बन्धलाई थप मजबुत बनाउने, बजारका चुनौती र सम्भावनाबारे छलफल गर्ने तथा आगामी व्यावसायिक योजनाबारे जानकारी गराउने प्रयास गरिएको हो। उहाँले कम्पनीको सफलतामा बिक्रेताहरूको महत्वपूर्ण भूमिका रहेको उल्लेख गर्दै भविष्यमा अझ गुणस्तरीय उत्पादन र उत्कृष्ट सेवा प्रदान गर्दै बजार विस्तारलाई निरन्तरता दिने प्रतिबद्धता व्यक्त गर्नुभयो।
कार्यक्रमका प्रमुख अतिथि निर्माण सामग्री व्यवसायी चितवनका निवर्तमान अध्यक्ष नरहरि घिमिरेले स्वदेशी उद्योगको प्रवर्द्धन र आत्मनिर्भर अर्थतन्त्र निर्माणका लागि यस्ता उद्योगहरूको भूमिका महत्वपूर्ण रहेको बताउनुभयो। उहाँले गुणस्तरीय स्वदेशी उत्पादनलाई प्रोत्साहन गर्दै नेपाली उद्योगलाई सशक्त बनाउन सबै व्यवसायी एकजुट हुनुपर्नेमा जोड दिनुभयो।
समिटमा पूर्वको मेचीदेखि पश्चिमको महाकालीसम्मका करिब १३० भन्दा बढी आधिकारिक बिक्रेताहरूको उल्लेखनीय सहभागिता रहेको थियो। कार्यक्रममा बजार विस्तार, ग्राहक सन्तुष्टि, उत्पादनको गुणस्तर, व्यवसायिक सहकार्य तथा आगामी योजनाका विषयमा अन्तरक्रिया समेत गरिएको थियो।
सो अवसरमा उत्कृष्ट बिक्रेताहरूलाई सम्मान गरिएको थियो भने कार्यक्रममा सहभागी सबै बिक्रेतालाई मायाको चिनो प्रदान गरिएको थियो। सम्मान कार्यक्रमले बिक्रेताहरूलाई थप उत्साहित र प्रेरित बनाएको आयोजकले जनाएको छ।
समापनका क्रममा सञ्चालक पौडेलले यस्ता कार्यक्रमले कम्पनी र बिक्रेताबीचको सम्बन्ध अझ प्रगाढ बनाउने विश्वास व्यक्त गर्दै आगामी वर्षहरूमा पनि ‘एक्वासिटि पार्टनर्स समिट’लाई निरन्तर आयोजना गरिने जानकारी दिनुभयो।
