चितवन- वडा शिक्षा समिति, भरतपुर महानगरपालिका–४ को आयोजनामा सम्मान तथा पुरस्कार वितरण कार्यक्रम सम्पन्न भएको छ। वडा कार्यालय परिसरमा आयोजित कार्यक्रममा शैक्षिक क्षेत्रमा उत्कृष्ट नतिजा हासिल गर्ने विद्यार्थी तथा विद्यालयहरूलाई सम्मान गरिएको हो।
Advertisement
कार्यक्रममा संस्थागत विद्यालयतर्फ वाल्मीकि शिक्षा सदन सम्मानित भएको छ। विद्यालयका कक्षा ८ को आधारभूत तह परीक्षामा ४.०० जीपीए प्राप्त गर्ने तीन जना विद्यार्थी, माध्यमिक शिक्षा परीक्षा (एसईई) मा ४.०० जीपीए हासिल गर्ने दुई जना विद्यार्थी तथा संस्थागत विद्यालयतर्फ उत्कृष्ट नतिजा ल्याउन सफल वाल्मीकि शिक्षा सदनलाई विशेष सम्मान प्रदान गरिएको थियो।
कार्यक्रमलाई सम्बोधन गर्दै वडा अध्यक्ष अर्पण पोख्रेलले भरतपुर महानगरपालिका भित्र सबैभन्दा बढी सामुदायिक तथा संस्थागत विद्यालय रहेको वडा नं. ४ मा विद्यार्थीहरूको मनोबल उच्च राख्न र शैक्षिक उत्कृष्टतालाई प्रोत्साहन गर्न सम्मान तथा पुरस्कार वितरण कार्यक्रम आयोजना गरिएको बताए। उनले यस्ता कार्यक्रमले विद्यार्थीहरूलाई थप मेहनत गर्न प्रेरणा मिल्ने विश्वास व्यक्त गरे।
कार्यक्रमका प्रमुख अतिथि बागमती प्रदेशसभा सदस्य उत्तम जोशीले शिक्षा क्षेत्रको विकासमा विद्यार्थी, शिक्षक, अभिभावक तथा विद्यालयको संयुक्त प्रयास आवश्यक रहेको उल्लेख गर्दै उत्कृष्ट नतिजा हासिल गर्ने विद्यार्थी तथा विद्यालयलाई बधाई दिएका थिए।
सो अवसरमा भरतपुर महानगरपालिका शिक्षा प्रशासन महाशाखाका वरिष्ठ विद्यालय निरीक्षक ऋषिराम शर्मा, वडा नं. ४ अन्तर्गतका सामुदायिक तथा संस्थागत विद्यालयका प्राचार्यहरू, जनप्रतिनिधि, विद्यार्थी, अभिभावक तथा सरोकारवालाहरूको उल्लेखनीय उपस्थिति रहेको थियो।
कार्यक्रममा सम्मानित विद्यार्थी तथा विद्यालयलाई प्रमाणपत्र, सम्मानपत्र तथा पुरस्कार प्रदान गरिएको थियो। आयोजकका अनुसार यस्ता कार्यक्रमले शैक्षिक गुणस्तर अभिवृद्धि गर्न तथा विद्यार्थीहरूमा प्रतिस्पर्धात्मक भावना विकास गर्न महत्वपूर्ण योगदान पुर्याउने अपेक्षा गरिएको छ।
