काठमाडौँ-
ठेक्कासम्बन्धी अनियमितताको आरोपमा पक्राउ परेका राष्ट्रिय प्रजातन्त्र पार्टी (राप्रपा) का उपाध्यक्ष विक्रम पाण्डेलाई ८ दिनसम्म हिरासतमा राखी अनुसन्धान गर्न अदालतले अनुमति दिएको छ ।
जिल्ला अदालत काठमाडौँले हिजोको आदेशमार्फत उनलाई थप ८ दिन प्रहरी नियन्त्रणमा राखेर अनुसन्धान अघि बढाउन स्वीकृति प्रदान गरेको हो ।
नेपाल प्रहरीको केन्द्रीय अनुसन्धान ब्युरो (सीआईबी) ले पाण्डेलाई गत शुक्रबार नियन्त्रणमा लिएको थियो । निर्माण व्यवसायसमेत गर्दै आएका उनी कालीका कन्स्ट्रक्सनका सञ्चालक हुन् ।
प्रहरीका अनुसार यस प्रकरणमा हालसम्म १३ जनालाई पक्राउ गरी अनुसन्धान भइरहेको छ, जसमा सात जना निर्माण व्यवसायी रहेका छन् ।
अनुसन्धानका क्रममा सार्वजनिक खरिद अनुगमन कार्यालयको अनलाइन प्रणाली (ई-बिडिङ) मा अनधिकृत पहुँच पुर्याई ठेक्का प्रक्रियासम्बन्धी विवरण हेरफेर गरिएको आरोप उठेको छ । आर्थिक प्रस्ताव खोलिनु अघि नै प्रस्ताव संशोधन गरेर ठेक्का प्राप्त गर्ने प्रयास भएको आधारमा अनुसन्धान अघि बढाइएको जनाइएको छ ।
यसै प्रकरणसँग सम्बन्धित अर्को चरणमा भीषण कन्स्ट्रक्सन प्रालिका सञ्चालक सामाखुसी निवासी टंककुमार श्रेष्ठ र चपुर निर्माण सेवा प्रालिका सञ्चालक काठमाडौँको बानियाटार बस्ने अमृत बोहरालाई पनि सोही दिन नियन्त्रणमा लिइएको प्रहरीले जनाएको छ ।
सीआईबीका अनुसार सबै प्रतिवादीविरुद्ध संगठित अपराध निवारण ऐन अन्तर्गतको कसुरमा अनुसन्धान जारी रहेको छ ।
