काठमाडौँ-
नेपाली काँग्रेस भित्रको आन्तरिक समीकरण परिवर्तनसँगै निवर्तमान सभापति शेरबहादुर देउवा पक्षले आगामी रणनीति तय गर्न परामर्शलाई तीव्रता दिएको छ।
पार्टीको आधिकारिक नेतृत्व गगनकुमार थापाको पक्षमा गएको पछिल्लो विकास क्रमपछि देउवा निकट समूहले संगठनभित्रको भूमिकाबारे पुनः मूल्यांकन गर्ने क्रममा विभिन्न तहमा छलफल अघि बढाएको हो।
यसै क्रममा देउवा समूहसँग सम्बद्ध पूर्व केन्द्रीय सदस्यहरूको बैठक धुम्बाराही स्थित स्मार्ट प्यालेसमा आइतबार सुरु भएको छ। उक्त छलफलमा समूहका प्रभावशाली नेता पूर्णबहादुर खड्का ले नेतृत्वदायी भूमिका निर्वाह गरिरहेका छन्।
यसअघि उनले आफ्नै निवासमा तत्कालीन पदाधिकारीहरूसँग प्रारम्भिक परामर्श गरेका थिए, जहाँ सर्वोच्च अदालतको निर्णयप्रति असहमति रहे पनि संस्थागत रूपमा स्वीकार गर्ने समझदारी बनेको जनाइएको छ।
आजको बैठकमा कृष्ण सिटौला, विमलेन्द्र निधि र प्रकाशमान सिंह लगायत नेताहरू सहभागी छन्। सहभागीहरूले पार्टीभित्रको आगामी भूमिकाबारे स्पष्ट रणनीति निर्धारण गर्ने तयारी भइरहेको बताएका छन्।
