काठमाडौँ-
प्रतिनिधि सभा सदस्य निर्वाचनअन्तर्गत तनहुँका दुई निर्वाचन क्षेत्रमा कुल २२ उम्मेदवारको चुनावी जमानत जफत भएको छ। जमानत गुमाउनेमा नेकपा (एमाले)बाट तनहुँ-१ मा प्रतिस्पर्धा गरेकी पूर्वमन्त्री भगवती न्यौपाने पनि परेकी छन्।
निर्वाचन कानुनअनुसार खसेको सदर मतको कम्तीमा १० प्रतिशत मत प्राप्त गर्न नसक्ने उम्मेदवारले धरौटीबापत बुझाएको रकम फिर्ता पाउँदैनन्। तनहुँ-१ मा ६८ हजार १४९ मत खसेकोमा ६५ हजार ४१९ मत सदर भएको थियो। पूर्वमन्त्री न्यौपानेले ५ हजार ८३० मत प्राप्त गरेपछि उनको जमानत जफत भएको हो।
यस क्षेत्रमा कुल १६ जना उम्मेदवार प्रतिस्पर्धामा थिए। तर निर्वाचित राष्ट्रिय स्वतन्त्र पार्टी ९रास्वपा०का स्वर्णिम वाग्ले र उनका निकटतम प्रतिद्वन्द्वी नेपाली काँग्रेसका गोविन्द भट्टराईले मात्रै जमानत जोगाएका छन्। वाग्लेले ३८ हजार ४० मत प्राप्त गर्दै विजय हासिल गरेका थिए भने भट्टराईले १६ हजार २३१ मत पाएका थिए।
तनहुँ–१ मा पूर्वमन्त्री न्यौपानेसहित नेपाली कम्युनिस्ट पार्टीका विद्यानाथ ढकाल, श्रम संस्कृति पार्टीका काशीराम गुरुङ, राष्ट्रिय प्रजातन्त्र पार्टीका रामदत्त जोशी, उज्यालो नेपाल पार्टीका मञ्जिल राना, मंगोल नेसनल अर्गनाइजेसनका प्रेमबहादुर थापा, नेपाल मजदुर किसान पार्टीकी रामलक्ष्मी दुवाल, नेपाल जनमुक्ति पार्टीका यामबहादुर आले, नेसनल रिपब्लिकन पार्टीका सुमन थापामगर, नेपाल कम्युनिस्ट पार्टी (माओवादी)का ओमविक्रम पन्त, आम जनता पार्टीकी चिजामाया अधिकारी लगायतका उम्मेदवारको जमानत जफत भएको छ। स्वतन्त्र उम्मेदवार दीपकराज जोशी, लेखनाथ खनाल र सन्देश रानाभाट लौडारीको पनि जमानत जोगिन सकेन।
तनहुँ-२ मा भने तीन उम्मेदवारले मात्र जमानत सुरक्षित राख्न सकेका छन्। यहाँ रास्वपाका इञ्जिनियर श्रीराम न्यौपाने ३२ हजार ६८७ मतसहित निर्वाचित भएका छन्। नेपाली काँग्रेसका शंकर भण्डारीले १४ हजार १३५ मत र नेकपा (एमाले)का केदार सिग्देलले ११ हजार ६६८ मत प्राप्त गर्दै जमानत जोगाएका छन्।
यस क्षेत्रमा नेपाली कम्युनिस्ट पार्टीका सोमबहादुर थापा, राप्रपाका यामबहादुर खाँड ठकुरी, मंगोल नेसनल अर्गनाइजेसनकी सुष्मा आले, नेपाल जनमुक्ति पार्टीका पूर्णबहादुर राना, नेपाल कम्युनिस्ट पार्टी (माओवादी)का गणेश लामगादे, नेसनल रिपब्लिक नेपालका नमबहादुर राना, राष्ट्रिय जनमुक्ति पार्टीका लालबहादुर सार्की गोतामे र नेपाल मजदुर किसान पार्टीका लक्ष्मण अधिकारीको जमानत जफत भएको छ।
प्रतिनिधि सभा निर्वाचनमा उम्मेदवारी दर्ता गर्दा १० हजार रुपैयाँ धरौटी बुझाउनुपर्ने व्यवस्था छ। महिला, दलित, अल्पसंख्यक तथा आर्थिक रूपमा विपन्न उम्मेदवारलाई उक्त रकममा ५० प्रतिशत छुट दिने प्रावधान रहेको छ। सदर मतको १० प्रतिशतभन्दा कम मत प्राप्त गर्ने उम्मेदवारको धरौटी रकम जफत हुने कानुनी व्यवस्था रहेको छ।
