काठमाडौँ-
नेपाली कम्युनिस्ट पार्टीका संयोजक तथा पूर्व प्रधानमन्त्री पुष्पकमल दाहाल ‘प्रचण्ड’ले मुलुकको शासन प्रक्रियामा बाह्य शक्तिहरूको सक्रियता देखिएको दाबी गर्दै त्यसप्रति रुकुमपूर्वबाट राजनीतिक जवाफ दिने बताएका छन्।
रुकुमपूर्वमा आयोजित पत्रकार सम्मेलनमार्फत उनले समसामयिक राजनीति र आगामी कार्यदिशाबारे धारणा सार्वजनिक गरेका हुन्।
उनले दाङ-रोल्पा हुँदै रुकुमपूर्वको हुकाम र मैकोटलाई डोल्पाको सहरतारासँग जोडेर चीनसम्म पुग्ने वैकल्पिक व्यापारिक मार्ग निर्माण गर्ने योजना अघि सारेका छन्। रुकुमपूर्व हिमाली जिल्ला बनेको सन्दर्भ उल्लेख गर्दै उनले यस क्षेत्रलाई विशेष स्वायत्त प्रदेशको अवधारणामा अघि बढाउन पहल गर्ने प्रतिबद्धता व्यक्त गरे। साथै, जिल्लालाई विकासको नयाँ मोडेलमार्फत रूपान्तरण गरिने आश्वासन पनि दिएका छन्।
आफूले राजनीतिक संघर्ष थालेको भू-भागमै परिवर्तनको अनुभूति गराएको दाबी गर्दै दाहालले आलोचनाको उत्तर व्यवहारिक काममार्फत दिने बताएका छन्। देशको वर्तमान जटिल राजनीतिक अवस्थालाई निकास दिन जनयुद्धको आधार भूमि मानिने रुकुम फर्किएको उल्लेख गर्दै उनले आफ्नो उम्मेदवारी संसद्मा सीमित नभई देशलाई नयाँ राजनीतिक दिशातर्फ लैजान केन्द्रित रहेको स्पष्ट पारेका छन्।
उनले रुकुममा आफ्नो उपस्थितिको अर्थ स्थानीय पूर्वाधार विकासमा मात्र सीमित नभई समग्र देशलाई शान्तिपूर्ण संकल्पतर्फ उन्मुख गराउने प्रयास भएको बताए। भदौ २४ गते भएको ‘जेन जेड’ आन्दोलनपछिको अवस्थाका कारण भदौ २६ गते रातभरको छलफलपछि संसद् विघटन गरी निर्वाचनमा जाने निर्णय गरिएको प्रसंग पनि उनले स्मरण गरेका छन्।
माओवादी सशस्त्र संघर्षकालमा चुनबाङ बैठकबाट शान्ति प्रक्रियाको सुरुआत भएको उल्लेख गर्दै दाहालले अब रुकुमपूर्वले समाजवादतर्फको यात्रामा नेतृत्वदायी भूमिका खेल्ने धारणा अघि सारेका छन्।
