सुनसरीमा ट्रक दुर्घटना हुँदा ५ जनाको घटनास्थलमै मृत्यु भएको छ।
हुलाकी राजमार्गबाट बिहीबार बिहान साढे ५ बजे विराटनगरबाट राजविराजतर्फ जाँदै गरेको को १ ख ४५४१ नम्बरको ट्रक पल्टिँदा ५ जनाको मृत्यु भएको हो।
भोक्राहा नरसिंह गाउँपालिका-८ मा अनियन्त्रित भई पल्टिँएको जिल्ला प्रहरी कार्यालय सुनसरीका डिएसपी चन्द्र खड्काले जानकारी दिए।
डिएसपी खड्काका अनुसार मृत्यु हुनेमा ३२ वर्षीय धीरेन्द्र गुरुङ, ५५ वर्षीय बर्मदेव गुरुङ, ५० वर्षीय टंक गुरुङ, २८ वर्षीय निसु गुरुङ र ५५ वर्षीय चन्द्र गुरूङ छन्।
उनीहरू सबै सुनसरीको बर्जु गाउँपालिका वडानम्बर-१ का बासिन्दा हुन्। उक्त ट्रकमा चालकसहित ९ जना सवार थिए।
मार्बल बोकेको ट्रकमा पछाडि ५ जना र अगाडि चालकसहित ४ जना सवार थिए। ट्रक पल्टिँदा पछाडि सवार ५ जनाको मृत्यु भएको डिएसपी खड्काले जानकारी दिए।
‘अगाडि बस्ने तीन जनाको विराटनगरस्थित विराट नर्सिङ होममा उपचार भइरहेको छ। उनीहरूको अवस्था सामान्य छ,’डिएसपी खड्काले भने, ‘चालक भने फरार छन्। खोज्ने काम भइरहेको छ।’
