चितवन – चितवन उद्योग वाणिज्य संघको ५९ औं बार्षिक साधारण सभा तथा अधिवेशन नजिकिएसंँगै
शिरिष पन्त समुहले उम्मेद्वारी घोषणा गरेको छ । शनिबार चितवन उवासंघ परिषरमा आयोजित पत्रकार सम्मेलनमा पन्त समुहले उम्मेदवारी घोषणा गरेका हुन । पन्त समुहको अध्यक्ष पदमा शिरिष पन्तले उम्मेद्वारी दिएका छन । यस्तै वरिष्ठ उपाध्यक्षमा पदमा लोक बहादुर रानाभाट , उपाध्यक्षमा त्रय जनक पौडेल, शंकर घिमिरे र गुणराज पौडेल रहेका छन । अन्य कार्यसमिति सदस्यमा क्रमश उम्मेदवारी घोषणा हुने पन्त समुहको भनाई छ ।
सो अवसरमा बोल्दै उम्मेद्वार पन्तले व्यवसायीका समस्या समाधान हक हितका लागि आफूले अध्यक्ष पदमा उम्मेद्वारी दिएको बताए । उवासंघका विद्यमान समस्या समाधान गर्न आफ्नो टिम सक्षम र योग्य रहेको समेत उनले बताए ।
उनले अव्यस्थित पार्किङ व्यवस्थापनदेखि सूचना प्रविधिमैत्री सचिवालय बनाउने समेतका प्रतिबद्धता व्यक्त गरे ।
यस्ता छन् पन्त प्यानलका प्रतिबद्धता
१. भरतपुर तथा नारायणगढ बजारलाई थप व्यवस्थित गर्नका लागि पार्किङ्ग र फुटपाथ व्यवसायीहरुको उचित व्यवस्थापन गर्न ठोस प्रस्तावसहित सम्बन्धित निकायमा पहल गरिने । (सर्भिस लेनको दुवै पट्टिको ढलको ढकन माथि दुइ पाङ्ग्रे सवारी साधनको पार्किङ्ग व्यवस्थापनमा पहल गरिने )
२ . पुलचोक देखि पोखरा बसपार्क सम्मको सडकलाई व्यवस्थित गर्नका लागि मेनरोड क्षेत्र भित्र यात्रुबहाक सवारी साधन मात्रै सञ्चालन गर्ने व्यवस्था मिलाउन पहल गरिने ।
३. पोके, ठेला तथा हाटबजारलाई व्यवस्थित गर्न पहल गरिने ।
४. व्यवसाय कर, घरबहाल कर तथा विज्ञापन करको समस्यालाई नीतिगत रूपमा समाधान गर्न पहल गरिने ।
५. वैज्ञानिक घर भाडा प्रणाली लागु गराउन सम्बन्धित निकायमा पहल गरिने ।
६. चितवनका होटल तथा रेष्टुरेन्टहरुलाई २४ सैं घण्टा सञ्चालन गर्न दिन आवश्यक पहल गरिने ।
७ .स्थानीय व्यवसायीले सामान लोड, अनलोड गर्दा हुँदै आएको असुविधाको लागि सम्बन्धित निकायसँग सहजताका लागि पहल गरिने ।
८. नारायणी नदी किनारमा रहेका अस्तव्यस्त ठेलाहरूलाई व्यवस्थित गर्न स्थानीय निकायसँग समन्वय गरिने ।
९ .प्रर्दशनी तथा महोत्सवलाई सुव्यवस्थित बनाउन उद्योग संघ तथा विभिन्न निकायसँग समन्वय गरिने ।
१० . अव्यवस्थित रुपमा संचालन हुने मेला महोत्सव न्युनिकरण गर्न पहल गरिने ।
११ . जिल्लाको कृषि, शिक्षा, स्वास्थ्य पर्यटन तथा आइटी ( सूचना प्रविधि) क्षेत्रको विकास, प्रर्वद्धन र प्रचारप्रसारका लागि सरोकारवालासँग आवश्यक समन्वय गरिने ।
१२ . संघको वेवसाईट सूचना प्रणाली, फेसबुक पेज लगायतलाई नियमित अद्यावधिक गरिने ।
१३ . चितवन उद्योग वाणिज्य संघकोे नयाँ सदस्यता प्रदान गर्न तथा नविकरणका लागि डिजिटल एपमार्फत गर्ने व्यवस्था मिलाइने ।
१४ .क्याम्पाचौरलाई मिनी स्टेडियमको रुपमा विकास गर्न आवश्यक पहल कदमी लिइने ।
१५.चितवन महोत्सवको गरिमा बढाउनका लागि बिक्री वितरणको स्टल भन्दा प्रर्दशनी स्टलहरुलाई प्रोत्साहन गरिने ।
१६ .चितवन महोत्सवको स्टल बुकिङ्गमा स्थानीय उद्योगी तथा व्यवसायीलाई प्राथमिकता दिईने ।
१७. चितवन महोत्सवका स्टलहरु व्यवस्थित गर्नका लागि अनलाईन बुकिङ प्रणाली लागु गरिने ।
१८ . चितवन महोत्सवको हिसाबकिताब ३५ दिनभित्र सार्वजनिक गरिने ।
१९ .विधान शंशोधन गरी कार्यसमिति सदस्यको २५ बर्षे उमेर हदबन्दी खारेज गरिने ।
२० .विधान शंशोधन गरी चितवन उद्योग वाणिज्य संघको कार्यक्षेत्रमा आईटी ( सूचना प्रविधि) लाई समावेश गरी एकजना आईटी बिशेषज्ञलाई विशिष्ट सदस्यमा मनोनितको व्यवस्था गर्ने ।
२१. महिला व्यवसायीहरुको क्षमता तथा नेतृत्व विकासका लागि विधान शंसोधन गरि महिला उपाध्यक्ष पदको व्यवस्था गरि संघलाई समावेशी बनाउने । साथै महिला व्यवसायीहरुको प्रतिनिधित्वलाई अभिप्रेरित गर्दै उद्योग तथा वाणिज्य क्षेत्रबाट थप एक– एक सदस्य अनिवार्य गरिने ।
२२.व्यवसायी सदस्यताको शुल्कमा लिइने जरीवानालाई खारेज गरिने ।
२३ . निष्कृय रहेका व्यवसायी सदस्यहरुलाई शुल्क छुटको व्यवस्था गरी संघमा पुनः आवद्ध गराउन पहल गरिने ।
२४. संघले संचालन गरेको अतिथि गृह बन्द गरी वस्तुगत संघलाई कार्यालय संचालन गर्न दिईने ।
२५ .नियमित पेशा व्यवसाय सञ्चालन नगर्ने तथा सरकारी निकायमा तिर्नुपर्ने दायित्व नतिरेका व्यवसायीको सदस्यता छानविन गरेर हटाई संघलाई व्यवसायीहरुको मात्रै विशुद्ध संगठन बनाउने ।
२६. व्यवसायीहरुलाई सक्षम बनाउनको लागि वहांँहरुको आवश्यकता अनुसार विभिन्न तालिम, सेमिनार तथा गोष्ठी संचालन गर्ने ।
२७ . जिल्लाका स्थानीय उत्पादनलाई प्रवद्र्धन गर्नका लागि ‘मेड इन चितवन’ को अवधारणा बनाई प्रचारप्रसार गरिने ।
२८ . नीतिगत रुपमा पहल गर्नुपर्ने विविध व्यवसायिक विषयमा स्थानीय , प्रदेश तथा केन्द्रीय सरकारसंँग बहस पैरवी गर्ने ।
२९ नारायणगढका भित्री बजारहरुमा व्यवसायीहरुको सल्लाह सुझावको आधारमा यातायातमा ‘वनवे’ प्रणाली लागु गराउन पहल गरिने ।
३० . व्यवसायमैत्री नीति निर्माणका लागि विभिन्न जिल्ला, नगर उद्योग वाणिज्य संघ तथा महासंघ समक्ष समन्वय गरिने ।
साथै उनको समुहले सार्वजनिक गरेका योजनाहरु पर्याप्त हुन नसक्ने भन्दै आफ्नो समुह निर्वाचित भए सरोकारवालाहरुसँग आवश्यक छलफल गरी राय र सुझाव लिएर कार्ययोजनालाई अझ व्यापक बनाउने प्रतिबद्धता समेत व्यक्त गरेका छन ।
