नवलपुर, देवचुली —
देवचुली नगरपालिका–६ मृत्युङमा सिंचाई कुलो र खोलातटबन्दन योजना सम्पन्न भएको छ। नगरपालिका, कारितास नेपाल र स्थानीय जनसहभागितामा सम्पन्न दुई योजनाको उद्घाटन मंगलबार एक औपचारिक समारोहबीच गरिएको हो।
कार्यक्रमको उद्घाटन नगर उपप्रमुख पार्वता तिवारी, कारितास फिनल्याण्डकी महासचिव लारिसा फ्रान्ज–कोइभिस्टो र कारितास अष्ट्रियाका एन्ड्रियास न्याप र कारितास नेपालकी कार्यकारी निर्देशक सिस्टर सिसिलिया दुर्गा श्रेष्ठले संयुक्त रूपमा गरे।
वडा अध्यक्ष मिनबहादुर सोतीका अनुसार मृत्युङमा सम्पन्न सिंचाई र तटबन्दका दिगो पूर्वाधारले यहाँका कमजोर आर्थिक अवस्थाका किसानहरूलाई लाभदायी हुने अपेक्षा गरिएको छ। योजना मार्फत ग्रामीण क्षेत्रमा कृषि उत्पादन बढाउने र बाढीजन्य जोखिम न्यूनीकरणमा सहयोग पुग्ने विश्वास लिइएको छ।
उद्घाटन कार्यक्रममा कारितास नेपालका उच्च अधिकारी तथा कर्मचारी, जनप्रतिनिधि र स्थानीय लाभग्राहीहरूको उल्लेखनीय उपस्थिति थियो।
मृत्युङ सिंचाई कुलो तथा बौलाहा खोला तटबन्दन निर्माण उपभोक्ता समितिका अध्यक्ष जबरसिंह ठाडाको अध्यक्षतामा सम्पन्न कार्यक्रममा नगर प्रवक्ता तिलप्रसाद काफ्ले, कारितास अष्ट्रिया एसियाका प्राविधिक सल्लाहकार सुनिल साइमन, र कारितास नेपालकी कार्यकारी निर्देशक सिस्टर सिसिलिया दुर्गा श्रेष्ठलगायतको सहभागिता रहेको थियो।
त्यस अवसरमा कारितास नेपालका कार्यक्रम संयोजक चिन्तन मानन्दर, प्रदेश संयोजक हरिससिंह कुँवर र जिल्ला परियोजनाका वरिष्ठ अधिकृत सुजन गौलीले योजना कार्यान्वयनका प्रगति, चुनौती र भविष्यमा जनउत्तरदायित्वका विषयमा धारणा व्यक्त गरे।
वडा अध्यक्ष सोतीका अनुसार १४ लाख ४२ हजार ७९२ रुपैयाँ लागतमा पक्की कुलो र तटबन्द निर्माण कार्य सम्पन्न गरिएको हो।
