नेकपा माओवादी केन्द्रसँग निकट युवाहरूले ‘जेनजी रेड टास्क फोर्स’ गठन गरेका छन्। नयाँ पुस्तालाई क्रान्तिकारी विचार, अनुशासन र संगठनमा सशक्त रूपमा संगठित गर्ने उद्देश्यले गठन गरिएको यो टास्क फोर्सको नेतृत्व अखिल (क्रान्तिकारी) विद्यार्थी संगठनकी केन्द्रीय सदस्य स्मृति तिमल्सिनाले लिएकी छन्।
यो टास्क फोर्स देशभरका युवाहरूलाई वैचारिक, राजनीतिक र सामाजिक रूपान्तरणको दिशामा उर्जाशील बनाउन गठन गरिएको हो। अहिले सम्म ४० जिल्लामा संयोजक र सदस्यहरू तोकिएका छन् भने बाँकी जिल्लामा गठनको प्रक्रिया तीव्र गतिमा अघि बढाइएको जनाइएको छ।
यसै सन्दर्भमा, चितवनका युवा नेता सुरज परियारलाई जेनजी रेड टास्क फोर्सको केन्द्रीय सदस्यको जिम्मेवारी दिइएको छ। परियार अखिल (क्रान्तिकारी) विद्यार्थी संगठनका सक्रिय नेता हुन् र हाल चितवन जिल्ला को सह–सचिवको जिम्मेवारीमा रहेका छन्।
परियारले जिम्मेवारी पाएपछि भने —
“नयाँ पुस्तालाई विचार र संगठनमा सुदृढ बनाउने हाम्रो लक्ष्य हो। युवाहरूको ऊर्जालाई जनताको पक्षमा प्रयोग गर्दै समाज रूपान्तरणमा योगदान दिनेछौँ।”
यो अभियानले माओवादी आन्दोलनमा नयाँ पुस्ताको भूमिका सुदृढ बनाउने अपेक्षा गरिएको छ। संगठनका नेताहरूका अनुसार, टास्क फोर्समार्फत देशभरका विद्यालय, कलेज र स्थानीय तहका युवाहरूलाई वैचारिक प्रशिक्षण, जनसेवा र सचेतना कार्यक्रमहरूमा संलग्न गराइनेछ।
