गैँडाकोट साउन २६
अक्सफोर्ड कलेज अफ इन्जिनियरिङ एण्ड म्यानेजमेन्टको २५औँ वार्षिकोत्सवको अवसरमा आयोजना गरिएको ‘अक्सफोर्ड मेला २०२५’ गैँडाकोटस्थित कलेज प्राङ्गणमा भव्य रूपमा सुरु भएको छ।
तीन दिनसम्म सञ्चालन हुने यस मेलाको उद्घाटन पोखरा विश्वविद्यालय व्यवस्थापन विभागका डिन, एसोसिएट प्रोफेसर डा. दयाराज ढकालज्यूले गर्नुभयो। उद्घाटन सत्रमा उहाँले अक्सफोर्ड कलेजलाई पोखरा विश्वविद्यालय अन्तर्गतको सर्वोत्कृष्ट शैक्षिक संस्थामध्ये एक रहेको उल्लेख गर्दै, अध्ययन-अध्यापनसँगै अतिरिक्त क्रियाकलापमार्फत विद्यार्थीको सर्वाङ्गीण विकासमा यसको योगदान प्रशंसनीय भएको बताउनुभयो। साथै, मेलाले विद्यार्थीहरूलाई नवप्रवर्तन, अनुसन्धान र व्यावहारिक सीप विकासमा संलग्न हुन प्रेरणा दिने अपेक्षा व्यक्त गर्नुभयो।
गैँडाकोट नगरपालिकाका नगर प्रमुख श्री मदनभक्त अधिकारीज्यूले अक्सफोर्ड कलेजको विभिन्न सामाजिक र शैक्षिक पहलले गैँडाकोटको प्रतिष्ठा उच्च बनाएको उल्लेख गर्दै, गैँडाकोटलाई शैक्षिक तथा सांस्कृतिक केन्द्रका रूपमा स्थापित गर्न यस मेलाले महत्वपूर्ण योगदान पुर्याउने धारणा व्यक्त गर्नुभयो।
गण्डकी प्रदेश उद्योग वाणिज्य महासंघका अध्यक्ष श्री अमृत भट्टचनज्यूले मेलाले विद्यार्थीको क्षमता विकासमा कोसेढुङ्गा बन्ने विश्वास व्यक्त गर्दै, वैदेशिक शिक्षातर्फको बढ्दो प्रवृत्ति न्यूनीकरण गर्न नीतिगत पहल आवश्यक रहेको बताउनुभयो।
यस अवसरमा प्रज्ञा एकेडेमी, मध्यविन्दु बहुमुखी क्याम्पस, वाइज भिजन स्कूल, सेन्ट्रल इङ्लिस स्कुल, नोबेल एकेडमी, सिद्धि विनायक आवासीय माध्यमिक विद्यालय, नेपाल आदर्श शिक्षा सदन, ग्लो साइन एकेडमी, मदरल्याण्ड एकेडमी, ओशन एकेडमी र भ्याली स्टेट कलेजलगायत ११ प्रतिष्ठित शैक्षिक संस्थासँग अक्सफोर्ड कलेजबीच शैक्षिक सहकार्यसम्बन्धी सम्झौता (MOU) हस्ताक्षर गरिएको छ। कलेजका प्राचार्य प्रा. डा. ई. हरि भण्डारीज्यूले सम्झौता अन्तर्गत शिक्षक तथा कर्मचारी तालिम, विद्यार्थी तालिम, गेस्ट क्लास, प्रयोगशाला तथा स्रोतको साझेदारी र पुस्तकालय पहुँच जस्ता पहलहरू सञ्चालन गरिने जानकारी दिनुभयो। साथै, यस वर्ष २५ विद्यालयसँग सहकार्य गर्ने लक्ष्य राखिएको समेत बताउनुभयो।
अक्सफोर्ड कलेजका सहायक प्राचार्य कृष्णहरि पौडेलज्यूले उद्घाटन सत्रका सम्पूर्ण गतिविधि सुमधुर र समन्वित ढंगले सञ्चालन गर्दै, कक्षा १२ पास गरेपछि सीपबिना विदेश जानुभन्दा देशमै अध्ययन गर्दै दक्षता हासिल गर्न विद्यार्थीहरूलाई आग्रह गर्नुभयो। मेलामा कोड वार, ब्रिज मोडलिङ, सर्किट डिजाइन, बिजनेस पिच प्रतियोगिता, मोकटेल, कुकिङ विथआउट फायर, आर्ट तथा पोस्टर डिजाइन, क्विज, पब्लिक स्पिकिङ च्यालेन्ज, प्यानल डिस्कसन, करियर गाइडेन्स सेसन, पब्जी टुर्नामेन्ट र बास्केटबल टुर्नामेन्टसहित १३ विविध कार्यक्रम समावेश छन्। पहिलो दिन पब्जी र बास्केटबल प्रतियोगिता तथा सांस्कृतिक प्रस्तुति सम्पन्न भएका छन् भने आगामी दिनहरूमा शैक्षिक प्रदर्शनी, नृत्य–संगीत, खेलकुद तथा मनोरञ्जनात्मक गतिविधिहरू हुनेछन्।
वि.सं. २०५७ सालदेखि पोखरा विश्वविद्यालयसँग सम्बन्धन प्राप्त गर्दै उच्च शिक्षा क्षेत्रमा प्रवेश गरेको अक्सफोर्ड कलेजले हाल स्नातक तहका ६ र स्नातकोत्तर तहको १ कार्यक्रम सञ्चालन गर्दै आएको छ। स्थापना कालदेखि नै शैक्षिक उत्कृष्टता कायम राख्दै आएको यस कलेजले डीन लिस्ट, गोल्ड मेडल तथा राष्ट्रियस्तरका उपलब्धिहरू हासिल गर्दै आफ्नो शैक्षिक पहिचान मजबुत पारेको छ।
