नवलपुर , जेठ २२
विश्व वातावरण दिवस २०२५ को अवसरमा मध्यविन्दु नगरपालिका–१० मा विशेष वृक्षारोपण तथा वातावरणीय सचेतना कार्यक्रम भव्य रूपमा सम्पन्न भएको छ। अधेरी खोल्सी सामुदायिक वनको आयोजनामा र कारितास नेपालको आर्थिक सहयोगमा सम्पन्न कार्यक्रमले हरियाली प्रवर्द्धन, प्लास्टिकजन्य प्रदूषण न्यूनीकरण र वातावरण संरक्षणसम्बन्धी जनचेतना अभिवृद्धिमा जोड दिएको छ।
कार्यक्रमका प्रमुख अतिथि डिभिजन वन कार्यालय, नवलपुरका प्रमुख वसन्त केशव अधिकारीले वातावरण संरक्षणमा सामुदायिक वनको भूमिकालाई महत्वपूर्ण रहेको बताउनुभयो। उहाँले भन्नुभयो, “वातावरण संरक्षणका प्रयासहरू केवल एक दिनका लागि सीमित हुनुहुँदैन, यो निरन्तर अभ्यासको विषय हो।”
सोही अवसरमा विशेष अतिथि मध्यविन्दु–१० का वडा अध्यक्ष रणबहादुर थापाले स्थानीय तहबाट वातावरणमैत्री नीतिहरू कार्यान्वयन गर्न प्रतिबद्धता जनाउनुभयो। उहाँले भन्नुभयो, “स्थानीय जनप्रतिनिधिहरूले वातावरण संरक्षणमा अग्रसर हुनुपर्ने आजको प्रमुख आवश्यकता हो।”
नारायणी बोर्डिङ स्कुलका विद्यार्थीहरूले वृक्षारोपण कार्यक्रममा उत्साहपूर्वक सहभागी जनाएका थिए। साथै, “प्लास्टिक प्रदूषण न्यूनीकरण : हाम्रो दायित्व” भन्ने नारासहित आयोजित कला कार्यक्रममा बालबालिकाहरूले सिर्जनात्मक प्रस्तुति र भाषणमार्फत वातावरणीय सन्देश प्रवाह गरेका थिए।
कार्यक्रमले स्थानीय बासिन्दा र विद्यार्थीहरूलाई वातावरणप्रति उत्तरदायी बन्न प्रेरणा दिएको सहभागीहरूको भनाइ छ।
