काठमाडौँ – त्रिभुवन विमानस्थल अध्यागमन कार्यालयका प्रमुख (सहसचिव) तीर्थराज भट्टराईलाई अख्तियारले १० दिनको ‘तारेख’ दिएको छ । उनलाई १० दिनपछि आउन भनेर तारेखमा राखिएको आयोगका एक जना उच्च अधिकृतले बताए । जेठ ७ मा अख्तियारमा उपस्थित गराइएका भट्टराईलाई अनुसन्धान अधिकृतहरूले दुई दिनसम्म लगातार आयोगमा बोलाएर सोधपुछ गरे । तर, डीएफएल रिपोर्ट नआएको हुनाले उनलाई १० दिनपछि बोलाइएको ती अधिकृतले जानकारी दिए । भट्टराईको मोबाइल र ल्यापटप लगायतका डिजिटल उपकरण अख्तियारले नियन्त्रणमा लिएर फरेन्सिक ल्याबमा परीक्षण गरिरहेको छ । भट्टराईसहित ४ जनाको मोबाइल परीक्षण भइरहेको भए पनि रिपोर्ट नआउँदा बयान लगायतका काम अघि बढेको छैन । पर्यटक भिसा लगाएर बिदेसिनेहरूसँग असुल्न त्रिभुवन विमानस्थल अध्यागमन कार्यालयका कर्मचारी र बिचौलियाले ‘कोडवर्ड’ प्रयोग गर्दै आएका थिए । उनीहरूले युएई र कुवेततर्फ जाने महिलाहरूबाट धेरै रकम असुल्ने गरेको तथ्यबारे अख्तियारका उच्च अधिकारीहरू जानकार थिए । त्यसबारे अख्तियारले अनुसन्धान गरिरहेको छ ।
