काठमाडौं – गत वर्ष प्रदर्शनमा आएको व्यापारिकरुपमा सफल ‘होस्टल–३’ निर्माण टिमले नयाँ फिल्म बनाउने घोषणा गेरेको छ ।
निर्देशक सशान कँडेलले बुधबार एक थिम पोस्टर सार्वजनिक गरी फिल्म ‘बाउ भर्सेस छोरा’ निर्माणको घोषणा गरेका हुन् ।
थिम पोस्टरले यो फिल्मले दुई पुस्ताको मत भिन्नताको कथा उठान गर्ने बुझाउँछ । निर्माण पक्षले दिएको जानकारी अनुसार यो फिल्म ‘एक्स जेनेरेसन’ र ‘जेड जेनेरेसन’को फरक सोचलाई फिल्ममा रोचक र गहन ढंगले उतारिनेछ ।
फिल्मका लेखक माधव शर्मा भन्छन्, ‘नेपाली समाजमा बढ्दो पुस्तागत टकराब र नयाँ पुस्ताले भोगिरहेको दुर्व्यसनको यथार्थता हामीले पर्दामा उतार्न खोजेका हौं ।’वर्तमान समयमा बुवा र छोराबीचको भौतिक दूरीसँगै सोच, व्यवहार, दृष्टिकोण र जीवनप्रतिको बुझाइमा आएको अन्तरलाई केन्द्र भागमा राखेर फिल्मको कथा लेखिएको उनले बताए ।
यो फिल्ममा पनि माधव र निर्देशक सशान कँडेलले सहकार्य गर्दैछन् । यो उनीहरुको दोस्रो सहकार्य हो । उनीहरुको पहिलो सहकार्य ‘होस्टल–३’मा भएको थियो, जुन फिल्मले ५१ दिन मनाएको थियो ।
‘होस्टल–३’मा जस्तै यस फिल्मको कथा निर्देशक कँडेलको हो भने स्क्रिप्ट शर्माले लेखेका हुन् ।
‘बाउ भर्सेस छोरा’को कलाकार चयनको काम बाँकी रहेको निर्माण पक्षले बताएको छ । यो र छायाङ्कन र प्रदर्शन मिति चाँडै सार्वजनिक गर्न तयारीमा निर्माण पक्ष रहेको बुझिएको छ ।
सम्मान इन्टरटेन्मेन्टको व्यानरमामा बन्ने यो फिल्मको कार्यकारी निर्माता शंकर कोइराला रहेको बताइएको छ।
