भरतपुर- नेपाल इन्जिनियर्स एसोसिएसन, बागमती प्रदेशले
“नेपाल राष्ट्रिय भवन संहिता: कार्यान्वयन तथा वर्तमान अवस्था”
विषयक विशेष सेमिनार २०७९ साल बैशाख २७ गते शनिबार,
उद्योग वाणिज्य संघ, चितवनमा सफलता र भव्यताका साथ सम्पन्न गरेको छ।
कार्यक्रममा प्रमुख अतिथि नेपाल इन्जिनियर्स एसोसिएसनका उपाध्यक्ष इञ्जि. प्रकाश के.सी.,
विशेष अतिथि स.इ. झपट बहादुर थापा,
बागमती प्रदेश अध्यक्ष इञ्जि. बलराम पुडासैनी,
तथा मुख्य वक्ताका रूपमा डु.डि.बि.सि.का इञ्जि. द्रोण कटुवालज्यूको सम्मानजनक उपस्थिति रह्यो।
कार्यक्रमको प्रारम्भिक सत्रमा इञ्जि. द्रोण कटुवालज्यूले नेपालमा भवन संहिताको कार्यान्वयन अवस्थामाथि आधारित प्रस्तुति राख्नुभयो।
उहाँले भवन संहिता लागू गर्ने क्रममा देखा परेका प्राविधिक, प्रशासनिक तथा कानुनी चुनौतीहरू, त्यससँग सम्बन्धित संस्थागत तयारीको अवस्था, र आगामी दिनमा सुधार तथा प्रभावकारी कार्यान्वयनका लागि आवश्यक रणनीतिक पहलहरूबारे स्पष्ट र तथ्यमा आधारित विश्लेषण प्रस्तुत गर्नुभयो।
यसपछि सम्पन्न भएको प्यानल छलफल सत्रमा विभिन्न क्षेत्रका विज्ञ तथा प्रतिनिधिहरूले आ–आफ्ना अनुभवहरू प्रस्तुत गर्नुभएको थियो।
इञ्जि. रवि थापा (भरतपुर महानगर), श्री सुमन श्रेष्ठ (उद्योग वाणिज्य संघ), श्री दिनेश चन्द्र नौपाने (निर्माण व्यवसायी संघ चितवन), अा. अल्फा श्रेष्ठ प्रधान (BEEN Project) लगायतका विज्ञहरूमाझ नगर प्रशासन, निर्माण नियमन, ऊर्जा दक्षता, र व्यावसायिक अभ्यासहरूमा आधारित गहन छलफल सम्पन्न भयो।
प्यानल छलफलले भवन संहिता कार्यान्वयनमा देखिने जटिलताहरू समाधान गर्न नीतिगत स्पष्टता, प्राविधिक जनशक्तिको अभिवृद्धि, स्थानीय तहमा क्षमता विकास, र समन्वयकारी ढाँचाको आवश्यकता स्पष्ट रूपमा औंल्याएको थियो।
यस सेमिनारले निर्माण क्षेत्र, नीतिनिर्माताहरू, प्राविधिक समुदाय र सरोकारवालाबीच गहिरो संवाद र सहकार्यको वातावरण तयार गरेको छ।
सुरक्षित, दिगो र संहिताअनुरूप पूर्वाधार निर्माणतर्फ अग्रसर गराउने उद्देश्य बोकेको यस कार्यक्रमलाई सहभागीहरूले अत्यन्त उपयोगी, ज्ञानमूलक र प्रेरणादायी कार्यक्रमको रूपमा मूल्यांकन गरेका छन्।
कार्यक्रमको समापनमा आयोजक संस्थाले उपस्थित सम्पूर्ण अतिथि, वक्ता, प्यानलिस्ट, सहयोगी संस्था र सहभागीप्रति
हार्दिक धन्यवाद तथा आभार व्यक्त गरेको छ।
