चितवन – घर निर्माणमा दक्ष जनशक्तिसहित स्थापना भएको एस वन होम्स र विभिन्न युवा उद्यमी व्यवसायीको समूह ‘भी ग्रुप’ को आयोजनामा वैशाख २५ गतेदेखि २७ गतेसम्म नारायणगढमा घर बनाउने मेला हुँदैछ । उद्योग वाणिज्य संघ चितवनको सभाहलमा बुधबार पत्रकार सम्मेलनको आयोजना गरी मेलाबारे जानकारी दिइएको हो ।
हरेक क्षेत्रमा सम्भावना बोकेको चितवनलाई लक्षित गरी घर बनाउने मेला गर्न लागिएको आयोजकको भनाइ छ । उद्योग वाणिज्य संघ चितवन र भरतपुर महानगरपालिकाको समन्वयमा आयोजना गरिएको यो मेला उद्योग वाणिज्य संघ चितवनको परिसरमा संचालन हुनेछ ।
घरजग्गा कारोबार तथा भवन निर्माणमा काठमाडौंपछि चितवन रहेको र यसलाई लक्षित गर्दै मेला आयोजना गर्न लागिएको मेलाका संयोजक विपीन कँडेलले बताए । घर तथा आवास निर्माणलाई गुणस्तरीय तथा सहज बनाउन अहिलेको आवश्यकता अनुसारका सुविधा तथा सामग्रीहरूबारे जानकारी गराउन सरकारी निकाय र निजी क्षेत्रको सहकार्यमा चितवनमा पहिलो पटक घर बनाउने मेला आयोजना गर्न लागिएको उनको भनाइ छ ।
घर जग्गा कारोवार, निर्माण तथा निर्माण सामग्री विक्रेता र सेवाग्राहीलाई एउटै छातामुनि सबै प्रकारका सेवाबारे जानकारी दिने उद्देश्य लिइएको छ । घर बनाउन चाहिने आवश्यक सामग्री, सरकारी मापदण्ड र सुरक्षाका विषयमा पनि मेलामा जानकारी गराइने आयोजकको भनाइ छ ।
घर तथा भवन निर्माण गर्दा चाहिने सामग्रीको जानकारीका साथै मेलामा घरजग्गा किनबेच गर्न खरिदकर्ता र विक्रेताबीच पनि भेट गराइने छ । मेलामा सरकारी सरोकारवाला निकाय, व्यवसायी विज्ञ, उपभोक्ता बीच परामर्श, अभिमुखीकरण, अन्तरक्रिया लगायतका कार्यक्रम हुने छन् । मेलामा घर तथा भवन निर्माणमा प्रयोग गरिने प्रविधि, सामग्री तथा खर्च र मितव्ययीतताको बारेमा पनि सेवाग्राहीले जानकारी पाउने छन् ।
मेलामा ३० वटा स्टल रहने छन् । तीन दिनसम्म चल्ने मेला १० हजार जनाले अवलोकन गर्ने आयोजकको अपेक्षा छ । मेलाले निर्माण कम्पनी, निर्माण सामग्री उत्पादक, घरजग्गा व्यवसायी, इन्जिनियर, उपभोक्ता, सर्वसाधारण र विद्यार्थीहरुलाई फाइदा पुग्ने विश्वास लिइएको छ । मेलामा नि:शुल्क प्रवेशको व्यवस्था गरिएको छ ।
श्रम तथा श्रमिकको सम्मानको लागि ८२ जना श्रमिकलाई मेलामा सम्मान गरिने बताइएको छ । यसैगरी भरतपुर–२९, चौकीडाँडाको स्कूलका ३० जना विद्यार्थीलाई सहयोग गरिने आयोजकको भनाइ छ ।
