चितवन – नेपाल कम्युनिष्ट पार्टी (माओवादी केन्द्र) भरतपुर महानगर समितीले भरतपुर महानगरपालिकालाई ज्ञापनपत्र बुझाएको छ । समितिले फागुन १ गतेलाई जनयुद्ध दिवसको रुपमा घोषणा गरी सार्वजनिक बिदा दिनुपर्ने माग गर्दै ज्ञापनपत्र बुझाएको हो ।
आज (बुधबार) समितिका अध्यक्ष ईश्वर सापकोटा सुमन र सचिव हरियन्द सुवेदीले भरतपुर महानगर प्रशासन महाशाखाका उपनिर्देशक विसु राम कुवरलाई ज्ञापनपत्र बुझाएको हो ।
ज्ञापनपत्रमा भनिएको छ, महान तथा गौरवशाली पार्टी नेपाल कम्युनिष्ट पार्टी (माओवादी केन्द्र) को नेतृत्वमा महान जनयुद्ध २०५२ फागुन १ गते सर्वहारा वर्गको राज्यसत्ता प्राप्त गर्ने उद्देश्य सहित सम्पूर्ण किसान मजदूर उत्पिडित जाति जनजाती भेग लिङ्ग र समुदायको न्यायिक आवाज सहित हतियारबद्ध लडाइको घोषणा गरेको कुरा सबैवेदितै छ ।
महान जनयुद्ध वास्तवमा आवाजविहिनहरु, हेपिएका, पिल्सिएका जनताको व्यबस्थालाई आपनै युद्ध थियो । जसले २४० वर्षे एकात्मक राज्यसत्ता व्यबस्थालाई उल्टाई संविधान सभा मार्फत संघीय लोकतान्त्रीक गणतन्त्र सहित समानुपातिक प्रतिनिधित्वको सुनिश्चितता सहित संघ, प्रदेश र स्थानीय सरकार विधिवत् पुनसंरचना भएको राजनैतिक उपलब्धी र प्राप्त संविधान २०७२ यहि जनयुद्धको जगमा भएको जनआन्दोलनले ल्याएको कुरा प्रष्ट छ।
त्यसकारण फागुन १ गतेलाई विजय उत्सवको रुपमा सम्मान गर्दै जनयुद्द दिवस घोषणा गरी सार्वजनिक विदा दिन जोडदार माग गर्दछौ ।
साथै जनयुद्ध दिवसको अवसरमा माओवादी केन्द्र भरतपुर समितिले भोलि फागुन १ गते पार्टी कार्यालय कृष्णपुरमा बिहान ७:३० बजे चियापान कार्यक्रम र बेलुका ६ बजे चौबिसकोठीमा दीप प्रज्वलन कार्यक्रमको आयोजना गरेको छ । सो कार्यक्रममा सबै जना सहभागी हुनका लागि समितिले आग्रह समेत गरेको छ ।
