संघीय लोकतान्त्रिक गणतन्त्र दिवस १६ वर्ष पूरा भइ १७ वर्षमा प्रवेश गरेको छ । नेपाललाई संघीय लोकतान्त्रिक गणतन्त्र नेपाल घोषणा गरिएको १६ वर्ष पूरा भइ १७ वर्षमा प्रवेश गरेको उपलक्ष्यमा स्वदेश तथा विदेशमा रहेका नेपालीहरुले शनिबार औपचारिकरुपमा गणतन्त्र दिवस मनाउँदै छन् ।
निर्वाचित संविधानसभाको १५ जेठ २०६५ मा बसेको पहिलो बैठकले २ सय ४० वर्षको इतिहास बोकेको राजतन्त्रको अन्त्य गर्दै नेपाललाई संघीय लोकतान्त्रिक गणतन्त्र घोषणा गरेको दिन पनि हो ।जनआन्दोलन २०६२/६३ को जगमा भएको निर्वाचनबाट गठित संविधानसभाको पहिलो बैठकले दुई सय ४० वर्ष लामो शाह वंशीय राजतन्त्रलाई हटाएर नेपालमा गणतन्त्र स्थापना भएको दिनको स्मरणमा पनि जेठ १५ लाई संघीय लोकतान्त्रिक गणतन्त्र दिवसका रुपमा मनाउँदैं आइएको छ ।
डिभिजन वन कार्यालय वीरगन्जले १७ औं गणतन्त्र दिवसको आयोजनामा वीरगन्ज महानगरपालिका वडा नम्वर १४ चिनिमिल पिपरा स्थित पशुपति मन्दिर परिसरमा वृक्षारोपण तथा सरसफाइ गरिएको हो ।
मन्दिर परिसरमा नेपाल प्रहरी र सशस्त्र प्रहरी नेपालले सरसफाइ गरेका थिए । वृक्षरोपण कार्यक्रममा वीरगन्ज महानगरपालिकाका प्रमुख राजेशमान सिंह, प्रमुख जिल्ला अधिकारी दिनेशसागर भुसाल, सहायक प्रमुख जिल्ला अधिकारी उत्तम कुमार घिमिरे, नेपाली सेनाका प्रमुख सेनानी डायमण्ड कार्की, पर्सा प्रहरी प्रमुख प्रहरी उपरीक्षक कुमोध ढुंगेल, सशस्त्र प्रहरी उपरीक्षक राधेश्याम धिमाल लगायत सरकारी कार्यालयका प्रमुख तथा प्रतिनिधिहरूको उपस्थितिमा वृक्षरोपण गरिएको हो ।
त्यसअघि बहुअरी स्थित मस्जिदमा सरसफाइ गरिएको थियो ।
