चितवनको गोलाघाटमा माघे संक्रान्ति मेला गरिने भएको छ ।कुमाल समाज नेपालले गर्ने माघे संक्रान्ति मेलामा देशभरका ७० जिल्लामा रहेका ६ हजार कुमाल समुदायको सहभागिता रहने जनाइएको छ ।
संस्थाका अध्यक्ष तेलबहादुर(विशाल) कुमाल र प्रचारप्रचार संयोजक राजन कुमालका अनुसार यस मेलामा सांस्कृति कार्यक्रमसहित कुमाल जातिको मौलिक भेषभुषाको प्रदर्शन गरिने भएको छ । मौलिक संस्कृतिलाई प्रवद्र्धन र प्रदर्शन गरिने लक्ष्य राखिएको यस माघे संक्रान्ति पर्वमा प्रधानमन्त्री पुष्पकमल दाहाल ‘प्रचण्ड’, संस्कृति मन्त्री सुदन किराँतीलगायत विभिन्न विशिष्ट व्यक्तिहरुको सहभागिता रहने छ । कार्यक्रममा कुमाल समुदायबाट विभिन्न पेसा र व्यवसायमा आवद्ध तीन दर्जन बढी व्यक्तित्वहरुलाई सम्मान गर्ने तयारी गरिएको समाजले जनाएको छ ।
समाजले कुमाल समुदायको लागि माघे संक्रान्ति दसैँ, तिहार भन्दा ठूलो पर्व भएको जनाएको छ । यस पर्वको बारेमा सरकारले सम्बोधन गर्नुपर्ने उनीहरुको माग छ । कुमाल समुदाय देशका ७० वटा जिल्लामा बसोबास गर्छन् । २०७८ को जनसांख्यिक आँकडाअनुसार एक लाख २९ हजार ७०२ जना रहेको छ । यस कार्यक्रममा ७० जिल्लाबाट ६ हजार बढी कुमालहरु सहभागी हुने जनाइएको छ । माघे संक्रान्तिको दिन कुमाल समुदायमा बिहानै घरको मुली खोलामा गएर नुहाउने र घरमा आइ पितृको नाममा पानी दिने र कुखुरा काटेर चामल र रगतमा मुछेको टिका लगाइदिने परम्परा रहेको कुमाल समाज नेपालले जनाएको छ । सोही दिन छोरी कुटुम्बलाई घरमा बोलाएर पुज्ने समेत गरिन्छ भने कुखुरा, सुँगुरको मासु, माछा, सेलरोटी, खुदौरो, भाते जाँड जसता मिठामिठा परिकार तथा प्राकृतिक फल खाने प्रचलन रहेको छ ।
