चितवन । फाल्गुन २५ गतेबाट देशभर प्रदर्शनको तयारीमा रहेको राष्ट्रभावले ओतप्रोत चलचित्र ‘काँडेतार’ को चितवनमा च्यारिटी शो हुने भएको छ । चलचित्र निर्माण टिमले पौष २१ गते नारायणगढको ईन्द्रदेव चलचित्र मन्दिरमा च्यारिटी गर्न लागेको हो । चलचित्र युनिटले आज (शुक्रबार) नारायणगढमा पत्रकार सम्मेलन आयोजना गरेर २१ गते शनिबार ३ बजे च्यारिटी गर्न लागिएको जानकारी दिएको हो ।
जनप्रतिनिधि, सुरक्षा निकायका प्रतिनिधि, वौद्धिक व्यक्तित्व, पत्रकारलगायतलाई देखाउनका लागि च्यारिटी गर्न लागिएको चलचित्रका निर्माता, निर्देशक, लेखक तथा कलाकार नवल खड्काले जानकारी दिनुभयो । चलचित्रले सिमानाको गम्भीर बिषय बोकेकोले समाज निर्माणमा महत्वपूर्ण भूमिका निर्वाह गर्ने वर्गलाई च्यारिटी मार्फत चलचित्र देखाउन खोजिएको खड्काले बताउनुभयो ।
यसबाट चलचित्रको माउथ पब्लिसिटीमा सहयोग पुग्ने अपेक्षा समेत रहेको उहाँको भनाइ थियो । च्यारिटीबाट खर्च कटाएर बचेको रकम सिमा रक्षाका क्रममा तथा सिमानामा घटेका घटनाबाट घाइते भएकाहरुको उपचारका लागि सहयोग गर्ने निर्माण पक्षको योजना छ । चलचित्र युनिट अहिले देशभर च्यारिटी गर्दै हिँडिरहेको छ । काठमाडौंलगायत केही ठूला सहरहरुमा यस अघि नै च्यारिटी शो गरिसकिएको खड्काले जानकारी दिनुभयो । चितवनपछि अन्य सहरहरुमा पनि च्यारिटी गरिने उहाँले बताउनुभयो ।
माटो र मान्छे जोगाउन पर्छ भन्ने मूल कथा बोकेको चलचित्र ‘काँडेतार’ सिमानामा काँडेतार लगाउन पर्छ भन्ने अभियानसहित निर्माण भएको हो । खुला सीमाका कारण आपराधिक गतिविधि नियन्त्रण तथा नियमनका लागि सिमानामा काँडेतार लगाउन आवश्यक रहेको खड्काको भनाइ थियो । चलचित्रको माध्यमबाट सिमानामा काँडेतारको बहस र अभियान सुरु गर्ने प्रयास रहेको खड्काले बताउनुभयो । चलचित्र दशगजाको छाँयाकनको क्रममा सिमानामा देखिएको आपराधिक घटनाले नै ‘काँडेतार’ जन्माएको खडकाले जानकारी दिनुभयो ।
देशको सिमाना निर्क्यौल तथा रक्षाको बिषय चलचित्रमा उठान गरिएको छ । । राष्ट्र र राष्ट्रियताको बिषयमा राज्य गम्भीर हुनुपर्छ भन्ने कथा पनि चलचित्रले बोकेको उहाँले बताउनुभयो । यस्तै सीमा रक्षाका लागि युवाहरु देशमै बस्नुपर्छ भन्ने सन्देश पनि चलचित्रले दिन खोजेको छ । चलचित्रमा नेपाली सिमानाको ईतिहास, अहिलेको समस्या र समाधानका बिषय रहेको खड्काको दाबी छ । उहाँले फाल्गुन २५ मा चलचित्रलाई एकल प्रदर्शन दिनुपर्ने बताउनुभयो ।
सोही दिन अन्य करिब चार चलचित्र पनि आउने चर्चा रहेकोले राष्ट्रभाव बोकेको “काँडेतार’ लाई एकल प्रदर्शन मिति दिन आग्रह गर्नुभयो । चलचित्रका कलाकार प्रशान्त यादवले सिमानामा देख्दै आएको आपराधिक घटनाले ‘काँडेतार’ मा काम गर्न प्रेरित गरेको बताए । चलचित्रले सिमानाको वास्तविकता देखाउन खोजेको भन्दै सच्चा देशभक्तहरुले चलचित्र ‘काँडेतार’ हेर्नै पर्ने बताउनुभयो ।
चलचित्रमा खड्का र यादवसँगै गौरव पहारी, सुर्बिना कार्की, रेविका गुरुङ, मुरलिधर, प्रेम सुब्बालगायतको पनि अभिनय रहेको छ । सत्याकला राई कार्यकारी निर्माता रहेको चलचित्र सौरभ लामाले खिचेँका हुन् । चलचित्रको टिजर र शिर्ष गीत सार्वजनिक भइसकेको छ ।
