चितवन, पुस १२-
राष्ट्रिय स्वतन्त्र पार्टीका सभापति एवम् चितवन क्षेत्र नं २ का सांसद रवि लामिछानेले आज दोस्रो सार्वजनिक सुनुवाई गर्दै छन् । जनप्रतिनिधि जनताप्रति जवाफदेही हुनुपर्छ भन्ने सन्देश दिन लामिछानेले दोस्रो पटक सार्वजनिक सुनुवाई गर्न लागेका हुन् ।
कालिका नगरपालिका–६ खोलेसिमलस्थित कालिका व्याङ्क्वेटमा बिहान ११ बजेदेखि सार्वजनिक सुनुवाई हुने पूर्वगृहमन्त्री समेत रहेका लामिछानेका स्वकिय सचिव प्रकाश सिग्देलले जानकारी दिए ।
जनसरोकारको विषयमा सार्वजनिक सुनुवाई गर्न लागिएको र यसमा राज्य र समाजका सबै सरोकारवाला पक्षहरुको प्रतिनिधित्व हुने भएकाले पार्टीको झण्डा, व्यानर, लोगो वा पोसाक नलगाउन रास्वपाले आग्रह गरेको छ ।
लामिछानेले यसअघि नारायणी कला मन्दिरमा पहिलो सार्वजनिक सुनुवाई गरेको थियो । लामिछानेले हिजो नारायणगढ–बुटवल दबाब यात्रा सम्पन्न गरेको छ ।
