साउन २२, चितवन । चितवनको रत्ननगरका एक युवाले डेढघन्टा पानीमा तैरिएर विश्व किर्तिमान कायम गरेका छन् । रत्ननगर नगरपालिका–१ बकुलहरका विकर्णकुमार श्रेष्ठले योगाशनमा बसेर डेढघन्टा पानीमा तैरिएर विश्व किर्तिमान कायम गरेका हुन् । रत्ननगरका अटो व्यवसायी समेत रहेका श्रेष्ठले डेढघन्टा पानीमा तैरिएर वर्ल्ड बुक अफ रेकर्ड लण्डनमा नाम लेखाउन सफल भएका हुन् ।
काठमाडौंको धुलिखेलमा रहेको हिमालय दृश्य रिर्साटको स्वीमिङ पुलमा तैरिएर श्रेष्ठले शिक्षा क्षेत्रमा देखिएका समस्या, चुनौती र त्यसको समाधानसम्बन्धी कार्यक्रम सञ्चालन गरेका थिए । श्रेष्ठले पानीमै तैरिएर डाक्टर, प्राध्यापक, शिक्षक, लेखकहरुसँग अन्तरक्रिया गरेका थिए ।
स्कोलोष्ट्रिक फाउण्डेशन नेपाल, लायन्स क्लव अफ रत्ननगर र लियो क्लव अफ राइनो रत्ननगरले यसैसाता कार्यक्रमको आयोजना गरेका थिए । वर्ल्ड बुक अफ रेकर्डमा नाम दर्ता भइसकेको र पाँच हप्ताभित्र प्रमाणपत्र आइपुग्ने श्रेष्ठले बताए ।
४३ वर्षीय श्रेष्ठ लायन्स क्लव अफ रत्ननगरका पूर्व अध्यक्ष र रत्ननगर जेसीजका पूर्वमहासचिव , आमा घरका आजीवन सदस्य, अर्पण बचत तथा ऋण सहकारी संस्थाका शिक्षा उपसमितिका सदस्य, चितवन अटो मोवाइल्स एशोसियसनका क्षेत्रगत उपसमिति सदस्य हुन् । नेपाल रेडक्रस सोसाइटीका आजीवन सदस्य समेत रहेका श्रेष्ठले अहिलेसम्म ८० पटक रक्तदान गरेका छन् ।
