भरतपुर, १ असोज
कालिका एफएमको गौरवमय २० औँ वार्षिकोत्सवका कार्यक्रमहरु सुरु भएका छन् । देवघाट क्षेत्र विकास समितले सञ्चालन गरेको देवघाट समाज कल्याण वृद्धाश्रममा आश्रित ज्येष्ठ नागरिकहरुलाई सम्मान गरी वार्षिकोत्सवका कार्यक्रमहरु सुरु भएका छन् । आश्रममा रहेका ज्येष्ठ नागरिकहरुलाई फलफूल, विहानी खाजा र विहानी खाना खुवाइएको छ ।
धार्मिक गीत–संगीत तथा प्रवचन सुन्न सहजताका लागि साउण्ड सिष्टम समेत सहयोग गरिएको छ । कालिका एफएमका निर्देशक दिपक पौडेलले ज्येष्ठ नागरिकहरुलाई राज्यले उचित पालनपोषण गर्न प्रयाप्त योजना तथा बजेट विनियोजन गर्नुपर्ने बताउनुभयो । उहाँले ज्ेयेष्ठ नागरिकहरुको सबै खाले उपचार निःशुल्क गर्ने नीति राज्यले ल्याउनुपर्ने बताउनुभयो । ज्येष्ठ नागरिकहरु ज्ञान, सीप र अनुभवको स्रोत भएकाले तीन तहकै सरकारले विशेष कार्यक्रमहरु ल्याउनुपर्ने बताउनुभयो ।
कालिका एफएमले सुरुवाती वार्षिकोत्सवदेखिनै वर्षेनी देवघाटधामबाटै वार्षिकोत्सव कार्यक्रमहरु शुभारम्भ गर्दै आइरहेको छ । ज्येष्ठ नागरिक सम्मान कार्यक्रममा बोल्दै देवघाट क्षेत्र विकास समितिका अध्यक्ष बद्री अधिकारीले कालिका एफएमका सामाजिक कामहरु प्रशंसनीय रहेको बताउनुभयो । असल सञ्चारमाध्यमका रुपमा छवि बनाएको कालिका एफएमले देवघाटको धार्मिक पर्यटन प्रर्वद्धनमा समेत उल्लेख्य योगदान गरेको बताउनुभयो ।
देवघाट गाउँपालिकाका उपाध्यक्ष भुवनसिं गुरुङले कालिका एफएमको दुई दशक सम्झनलायक र प्रशंसा गर्न लायक रहेको बताउनुभयो । कला, संस्कृति जगेर्नादेखि समस्या उजागर गर्दै राज्यको ध्नाकर्षण गराउन कालिका एफएमको योगदान महत्वपूर्ण रहेको बताउनुभयो ।
देवघाट–५ का वडाध्यक्ष पूर्णबहादुर कुँवरले कालिका एफएम समजप्रतिको उत्तरदायी रहदै अनुकरण गर्न योग्य सञ्चारकर्म गर्दै आइरहेको बताउनुभयो । कालिका एफएमका बरिष्ठ कार्यक्रम प्रस्तोता सनत अञ्जामले कालिका एफएम समाजकै दर्पणका रुपमा सधै जनताकै पक्षमा बोलिरहने बताउनुभयो ।
कालिका एफएम यही असोज २६ गते २१ वर्षमा प्रवेश गर्दैछ । २०५९ असोज २६ गते स्थापना भएको कालिका एफएमसँगै २०६४ देखि सांगितीक रेडियो कालिका ९१ मेघाहर्ज, २०७० देखि कालिका एचडी टेलिभिजन सञ्चालनमा छन् ।
