चैत्र २५, चितवन । आसन्न स्थानीय तहको निर्वाचनका लागि चितवनमा एक हजार ६९१ जना म्यादी प्रहरी छनौट भएका छन् जिल्ला प्रहरी कार्यालय चितवनले हिजो (बिहीबार) छनौट भएका सबै एक हजार ६९१ जनाको नाम सार्वजनिक गरेको छ । यस अघि एक हजार ७०९ जना भर्ना गरिने भए पनि १८ जनाको संख्या घटाईएको जिल्ला प्रहरी कार्यालयका प्रहरी प्रवक्ता डिएसपी नरहरी अधिकारीले जानकारी दिए ।
छनौट भएकाहरुलाई शुक्रबार बेलुका ५ बजेसम्म सम्पर्कमा आउन सूचित गरिएको समेत उनले बताए । उनीहरुको चैत २८ गतेदेखि तालिम सुरु हुनेछ । म्यादी प्रहरीका लागि चार हजार ३३ पुरुष हुन् भने एक हजार ४३३ महिला गरी पाँच हजार ४६६ जनाको आवेदन परेको थियो ।
छनोट भएका म्यादी प्रहरीलाई ७ दिन तालिम दिएर खटाउईनेछ । म्यादीका लागि ४० दिन कार्यावधि तोकेर प्रतिव्यक्ति पारिश्रमिक एकमुष्ट ३० हजार २ सय ४०, पोसाकबापत ६ हजार, रासनबापत एकमुष्ट ७ हजार २ सय र एक पटकका लागि सवारी खर्चबापत प्रतिव्यक्ति १ हजारका दरले रकम विनियोजन हुने गरी म्यादीको सुविधा निर्धारण गरिएको छ।
