चैत्र २२, चितवन । सत्ताधारी ५ दलीय गठवन्धनको भरतपुर महानगरपालिका स्तरीय संयन्त्रले बैशाख ३० को स्थानीय तह निर्वाचनमा चुनावी तालमेल गर्ने निर्णय गरेको छ । नेपाली काँग्रेस भरतपुर महानगरपालिका कार्यसमितिका सभापति चित्रसेन अधिकारीको अध्यक्षतामा मंगलवार बसेको बैठकले यो निर्णय गरेको हो ।
निर्णयको एक नम्बर बुँदामा भनिएको छ – ‘आसन्न स्थानीय तहको निर्वाचन २०७९ बैशाख ३० गते सम्पन्न हुन गइरहेको बिषयमा आज महानगर स्तरिय पाँच दलको बैठक बसी चुनाबी तालमेल गरि जाने निर्णय गरियो ।’ यस्तै निर्णयको दुइ नम्बर बुँदामा भनिएको छ – ‘गठबन्धनमा सहभागी दलहरुका विच गठबन्धनको मर्म र भावना अनुरुप एक आपसमा सम्मान र हार्दिकताको बिकास गर्दै गठबन्धनलाई निरन्तरता दिँदै स्थानीय तहको निर्वाचनमा सहभागी हुने निर्णय गरियो ।’
चुनाबी तालमेलको निर्णय भइरहँदा महानगरको प्रमुख कसले पाउला भन्ने आम चासो भने बढेको छ । यसबीचमा नेपाली काँग्रेसले मेयर आफुले पाउनु पर्ने निर्णय नै गरिसकेको छ भने माओबादी केन्द्रले पनि दाबी गरिरहेको छ ।
