चैत्र १२, चितवन । चितवनमा म्यादी प्रहरीका लागि माग भन्दा तीन गुणा बढी आवेदन परेको छ ।चितवनमा आगामी बैशाख ३० गते हुने स्थानीय तहको निर्वाचनका लागि एक हजार ७०९ म्यादी प्रहरीको माग गरिएको छ । तर माग संख्या भन्दा तीन गुणा बढी आवेदन परेक्को जिल्ला प्रहरी कार्यालय चितवनका प्रवक्ता डिएसपी नरहरी अधिकारीले जानकारी दिए ।
डिएसपी अधिकारीका अनुसार म्यादी प्रहरीका लागि पाँच हजार ४६६ जनाको आवेदन परेको छ । जसमध्ये चार हजार ३३ पुरुष हुन् भने एक हजार ४३३ महिला हुन् ।
अन्तिम दिन शुक्रबार मात्रै एक हजार २७ पुरुष र दुई सय ९३ महिला गरी एक हजार ३२० जनाले आवेदन दिएका थिए । आवेदन दिएका पाँच हजार ४६६ जना मध्ये एक हजार ७०९ जना मात्रै छनौट हुनेछन् ।
म्यादी प्रहरीको छनोट प्रक्रिया चैत १५ बाट सुरु हुनेछ। चैत २२ मा अन्तिम नतिजा प्रकाशन गरेर चैत २८ मा प्रशिक्षण सुरु हुनेछ। छनोट भएका म्यादी प्रहरीलाई ७ दिन तालिम दिएर खटाउने सरकारको तयारी छ।
म्यादीका लागि ४० दिन कार्यावधि तोकेर प्रतिव्यक्ति पारिश्रमिक एकमुष्ट ३० हजार २ सय ४०, पोसाकबापत ६ हजार, रासनबापत एकमुष्ट ७ हजार २ सय र एक पटकका लागि सवारी खर्चबापत प्रतिव्यक्ति १ हजारका दरले रकम विनियोजन हुने गरी म्यादीको सुविधा निर्धारण गरिएको छ। ४० दिनका लागि म्यादी प्रहरी भर्ना गर्न लागिएको हो।
