भदौ २२, देवघाट –
स्पाउज क्लब अफ आर सि चितवन( Spouse Club of RC Chitwan) को आयोजनामा देवघाटस्थित रोटरी करुणालय वृद्धाश्रम मा तीज विशेष दर खाने कार्यक्रम आत्मीय एवं उल्लासपूर्ण वातावरणमा सम्पन्न भएको छ।
नेपाली महिलाहरूको महत्वपूर्ण पर्व हरितालिका तीजको अवसरमा वृद्धाश्रममा रहेका ज्येष्ठ नागरिकहरूसँग खुशी साटासाट गर्दै उनीहरूको सम्मान, आत्मीयता र सामाजिक सहकार्य अभिवृद्धि गर्ने उद्देश्यले कार्यक्रम आयोजना गरिएको हो।
कार्यक्रमको अध्यक्षता स्पाउज अध्यक्ष श्रीमती जानकी शर्मा ले गर्नुभएको थियो भने सचिव श्रीमती बबिता घिमिरे ले कार्यक्रमको सञ्चालन गर्नुभएको थियो। कार्यक्रमका प्रमुख अतिथि रोटरी क्लब अफ चितवनका अध्यक्ष गेहेन्द्रमान श्रेष्ठ रहनुभएको थियो। त्यसैगरी करुणालयका अध्यक्ष तथा रोटरी क्लब अफ चितवनका पुर्ब अध्यक्ष उत्तमलाल चुके विशिष्ट अतिथिका रूपमा उपस्थित हुनुहुन्थ्यो।
कार्यक्रममा स्पाउज क्लबका २५ जना, रोटरियन १० जना, वृद्धाश्रमका ३५ जना आवासीय ज्येष्ठ नागरिक, बाह्य सेवाग्राही १२५ जना तथा कार्यालय कर्मचारी १० जना गरी उल्लेख्य सहभागिता रहेको थियो।
तीज विशेष भोजन कार्यक्रममा वृद्धाश्रमका ज्येष्ठ नागरिक तथा सहभागीहरूका लागि तीज विशेषका रूपमा साकाहारी खानाका विभिन्न परिकारको व्यवस्था गरिएको थियो।
कार्यक्रमका लागि आवश्यक आर्थिक स्रोत स्पाउज क्लब का सदस्यहरूको व्यक्तिगत योगदान, रोटरी क्लब अफ चितवन तथा वृद्धाश्रम बाट प्राप्त भएको थियो।
कार्यक्रममा अध्यक्ष जानकी शर्माले वृद्धाश्रममा बसोबास गरिरहनुभएका सम्पूर्ण महिला तथा पुरुष ज्येष्ठ नागरिकप्रति हार्दिक सम्मान र शुभेच्छा व्यक्त गर्दै तीजको खुशी उहाँहरूसँग बाँड्न पाएकोमा आभार व्यक्त गर्नुभयो। उहाँले कार्यक्रम सफल बनाउन सहयोग गर्ने सम्पूर्ण दानदाता, स्पाउज का सदस्य तथा रोटरियनहरूलाई धन्यवाद र आभार व्यक्त गर्नुभयो।
प्रमुख अतिथि रोटरी क्लब अफ चितवनका अध्यक्ष गेहेन्द्रमान श्रेष्ठले कठिन परिस्थितिमा पनि स्पाउज क्लबले ज्येष्ठ नागरिकहरूको सम्मान र खुशीका लागि गरेको यस्तो प्रशंसनीय कार्यक्रमको सराहना गर्दै कार्यक्रमका लागि बधाई तथा शुभकामना व्यक्त गर्नुभयो। उहाँले यस्ता सामाजिक तथा मानवीय कार्यक्रमले समुदायमा सकारात्मक सन्देश प्रवाह गर्ने बताउनुभयो।
त्यसैगरी करुणालयका अध्यक्ष तथा रोटरी क्लब अफ चितवनका पास्ट प्रेसिडेन्ट उत्तमलाल चुकेले स्पाउज क्लबका सदस्यहरूले वृद्धाश्रममा आएर ज्येष्ठ नागरिकहरूसँग तीजको खुशी साटेकोमा प्रशंसा गर्दै कार्यक्रमका लागि धन्यवाद व्यक्त गर्नुभयो। उहाँले वृद्धाश्रमका ज्येष्ठ नागरिकप्रति देखाइएको माया, सद्भाव र सहयोगका लागि आयोजक तथा सहयोगी सबैप्रति आभार प्रकट गर्नुभयो।
कार्यक्रमले “सेवा, सद्भाव र सहकार्यका लागि” भन्ने भावनालाई आत्मसात् गर्दै ज्येष्ठ नागरिकहरूको जीवनमा पनि खुशी, आत्मीयता र उत्साह थपेको आयोजकले जनाएको छ।
स्पाउज क्लबले आगामी दिनमा पनि समुदायका ज्येष्ठ नागरिक, महिला, बालबालिका तथा आवश्यकता भएका वर्गका लागि यस्ता सामाजिक तथा मानवीय सेवामूलक कार्यक्रमलाई निरन्तरता दिने प्रतिबद्धता व्यक्त गरेको छ।
