चितवन । श्रीकृष्ण जन्माष्टमीको पावन अवसर पारेर भरतपुर महानगरपालिका–१, देवघाट धाममा रहेको भागवत सेवा आश्रम एवं राधा रमण भगवानको अनावरण तथा समुद्घाटन कार्यक्रम सम्पन्न भएको छ।
धार्मिक तथा आध्यात्मिक क्षेत्रका व्यक्तित्व, साधुसन्त, आश्रमका सञ्चालक तथा भक्तजनहरूको उपस्थितिबीच विशेष धार्मिक वातावरणमा आश्रम तथा राधा रमण भगवानको अनावरण गरिएको हो। श्रीकृष्ण जन्माष्टमीको अवसरमा भगवान श्रीकृष्णको पूजा–आराधना, दर्शन तथा धार्मिक गतिविधिसहित कार्यक्रम आयोजना गरिएको थियो।
कार्यक्रम गलेश्वर आश्रमका पीठाधीश, अनन्त विभूषित महामण्डलेश्वर १००८ स्वामी आत्मानन्द गिरी महाराजको प्रमुख आतिथ्यमा सम्पन्न भएको हो। कार्यक्रममा धार्मिक तथा आध्यात्मिक क्षेत्रका विभिन्न व्यक्तित्वहरूको सहभागिता रहेको थियो।
कार्यक्रममा प्राध्यापक डा. गुरुप्रसाद सुबेदी लगायत देवघाट धाममा अवस्थित विभिन्न मठ, मन्दिर तथा आश्रमका सञ्चालकहरूको उपस्थिति रहेको थियो। देवघाट क्षेत्रका धार्मिक अगुवा, साधुसन्त तथा भक्तजनको सहभागिताले कार्यक्रमलाई थप विशेष बनाएको थियो।
भागवत सेवा आश्रमका अध्यक्ष तथा मधुर्य कथा वाचक बालकृष्ण अर्याल पण्डितको सभाध्यक्षतामा कार्यक्रम सम्पन्न भएको हो। कार्यक्रममा वक्ताहरूले देवघाट धामको धार्मिक, सांस्कृतिक तथा आध्यात्मिक महत्त्वबारे चर्चा गर्दै सनातन धर्म, संस्कार र आध्यात्मिक चेतनाको संरक्षणमा आश्रम तथा धार्मिक संस्थाहरूको भूमिकाबारे धारणा राखेका थिए।
श्रीकृष्ण जन्माष्टमी भगवान श्रीकृष्णको जन्मोत्सवका रूपमा नेपालसहित हिन्दू धर्मावलम्बीहरूले श्रद्धा र भक्तिपूर्वक मनाउने महत्वपूर्ण पर्व हो। यस अवसरमा देशभरका कृष्ण मन्दिर तथा धार्मिक स्थलहरूमा विशेष पूजा, भजन–कीर्तन, प्रवचन तथा धार्मिक कार्यक्रम आयोजना गरिन्छ।
देवघाट धाम पनि नेपालकै महत्वपूर्ण धार्मिक तथा तीर्थस्थलका रूपमा परिचित रहेको छ। यहाँ विभिन्न मठ, मन्दिर तथा आश्रमहरू सञ्चालनमा छन्। नयाँ आश्रम तथा राधा रमण भगवानको अनावरणसँगै देवघाटको धार्मिक गतिविधिमा थप ऊर्जा थपिने तथा भक्तजनका लागि आध्यात्मिक सेवा र धार्मिक गतिविधिको थप अवसर सिर्जना हुने अपेक्षा गरिएको छ।
श्रीकृष्ण जन्माष्टमीकै अवसरमा सम्पन्न यस कार्यक्रमले धार्मिक आस्था, संस्कार र आध्यात्मिक चेतनालाई प्रवर्द्धन गर्दै देवघाट धामको धार्मिक महत्त्वलाई अझ उजागर गर्ने विश्वास व्यक्त गरिएको छ।
