काठमाडौं–
राष्ट्रिय स्वतन्त्र पार्टी (रास्वपा) का सांसद सागर ढकाल र श्रीराम न्यौपाने त्रिशूली थ्री ‘ए’ जलविद्युत् आयोजनाको सुरुङ क्षेत्रमा भइरहेको उद्धार तथा खोजी कार्यबाट फिर्ता भएका छन्।
पार्टीको सचिवालय बैठकको निर्णयअनुसार दुवै सांसद स्थलमार्गबाट काठमाडौं फर्किरहेका छन्। इन्जिनियरसमेत रहेका सांसद ढकालले सामाजिक सञ्जालमार्फत सुरुङभित्रबाट मानिसको आवाज सुनिएको र उद्धार कार्यले आशाजनक मोड लिएको बताएका छन्।
उनले लेखेका छन्, ‘आवाज सुनिएको छ, अब इन्जिनियरिङ काम सकिएको छ, उद्धारको टिमको काम अगाडि छ। इन्जिनियरिङ हिसाबले यो ऐतिहासिक सफलता हासिल भएको छ।’
उनका अनुसार करिब सातदेखि आठ दिन लगाएर २० हजार घनमिटरभन्दा बढी लेदो र ढुंगा हटाइएको हो। सीमित र यथास्थितिका उपकरण प्रयोग गरेर समेत ठूलो चुनौतीपूर्ण काम सम्पन्न गरिएको उनले बताएका छन्।
‘बोलेका होइनौँ, सल्लाह दिएका होइनौँ, गरेर देखाएका हौँ,’ ढकालले लेखेका छन्। ढकालका अनुसार उद्धार कार्यका क्रममा सुरुङ उत्खनन र ड्रिलिङको अनुभव भएका प्राविधिकहरूलाई समेत परिचालन गरिएको थियो। उनले यसपटक प्राप्त अनुभवलाई भविष्यका उद्धार तथा विपद् व्यवस्थापनका काममा प्रयोग गर्ने बताएका छन्।
उनले नेपाली सेना, सशस्त्र प्रहरी, स्थानीयवासी, नेपाल विद्युत् प्राधिकरण तथा नेपाल र विदेशबाट सहयोग गर्ने सबैप्रति आभार व्यक्त गरेका छन्। ढकालले पैदल यात्रा गर्दै विदुर पुगेर त्यसपछि काठमाडौं फर्किने र पुनः सांसदको जिम्मेवारीमा फर्किने बताएका छन्।
उता तनहुँका सांसद तथा रास्वपाका ऊर्जा तथा खानी विभाग प्रमुख श्रीराम न्यौपानेले पनि सुरुङभित्रबाट मानिस बोलेको आवाज आएको जानकारी उद्धारमा खटिएको नेपाली सेनाबाट प्राप्त भएको बताएका छन्।
‘भित्रबाट मानिसको आवाज आएको जानकारी उद्धाररत सेनाबाट प्राप्त भएको छ। नेपाली सेना र सशस्त्र प्रहरीको उद्धार टोली सुरुङभित्र प्रवेश गरी उद्धार कार्यलाई तीव्रता दिइरहेको छ,’ उनले सामाजिक लेखेका छन्।
न्यौपानेले सुरुङभित्रबाट मानिसको आवाज सुनिनु आशाजनक संकेत भएको बताएका छन्। आफू बिहीबार साँझसम्म इन्जिनियरको भूमिकामा उद्धार तथा खोजी कार्यमा साइटमै संलग्न रहेको उल्लेख गर्दै अब सांसदको हैसियतमा हेलिकप्टर प्रयोग नगरी पैदल जनसंवाद गर्दै विदुरसम्म पुग्ने र त्यसपछि गाडीमार्फत काठमाडौं फर्किने तयारीमा रहेको बताएका छन्।
रास्वपाको बिहीबार बसेको सचिवालय बैठकले त्रिशूली थ्री ‘ए’ सहित भदौ १० गते भोटेकोशीमा आएको बाढीपछि थुनिएका सुरुङको उत्खनन तथा उद्धार कार्यमा सांसदहरूको उपस्थितिले कुनै अवरोध वा बाधा पुगे दुवैजनालाई फिर्ता बोलाउने निर्णय गरेको थियो।
त्यही निर्णयअनुसार ढकाल र न्यौपाने उद्धारस्थलबाट फर्किएका हुन्। बाढीपछि उनीहरू नेपाली सेनाको हेलिकप्टरमार्फत जलविद्युत् आयोजनाको सुरुङ थुनिएको क्षेत्रमा पुगेका थिए।
फर्किने क्रममा भने उनीहरूले हेलिकप्टर प्रयोग नगरी स्थलमार्ग रोजेका छन्।
