काठमाडौँ-
आन्दोलनरत चिकित्सक र स्वास्थ्य तथा खाद्य स्वच्छता मन्त्रालयका अधिकारीहरूबिच अनौपचारिक छलफल सुरु भएको छ । स्वास्थ्य मन्त्रालयमा जारी छलफलमा चिकित्सक सङ्घका मागका विषयमा अनौपचारिक कुराकानी भइरहेको छ ।
स्वास्थ्य मन्त्रालयका सहप्रवक्ता डा.समिरकुमार अधिकारीले सङ्घका मागहरूमा टेकेर अनौपचारिक छलफल भएको बताए । उनले यसपछि औपचारिक तवरबाट छलफल हुने बताए । चिकित्सकहरूको सुरक्षाको भरपर्दो ग्यारेन्टी हुनुपर्ने, दोषीलाई कारबाही हुनुपर्ने मागसहित दुई पक्षबिच मन्त्रालयमा छलफल भएको हो ।
सङ्घले नारायणी अस्पताल घटनाका दोषीलाई कारबाहीको माग गरेको छ । यस्तै, जिल्ला प्रशासन कार्यालय पर्सामा वार्ताका लागि पुगेका चिकित्सकहरूमाथि प्रमुख जिल्ला अधिकारीकै उपस्थितिमा पर्साका प्रहरी प्रमुखद्वारा प्रहरी परिचालन गरी गालीगलौज र दुर्व्यवहार गरिएको सङ्घले जनाएको छ । देशभरका चिकित्सकहरूको आन्दोलनको मारमा ओपीडी सेवा बन्द हुँदा बिरामीहरू परेका छन् ।
