भरतपुर – आदिकवि भानुभक्त आचार्यको २१३ औँ जन्मजयन्तीका अवसरमा वाल्मीकी शिक्षा सदनको लिट्रेचर क्लब अफ वाल्मीकीको आयोजनामा असार २९ गते (आज ) विशेष साहित्यिक कार्यक्रम सम्पन्न भएको छ।
लिट्रेचर क्लब अफ वाल्मीकीका अध्यक्ष दीप्सन कँडेलको अध्यक्षतामा सम्पन्न कार्यक्रममा प्लस टु संयोजक गणेश ढकालले स्वागत मन्तव्य व्यक्त गर्दै आदिकवि भानुभक्त आचार्यले नेपाली भाषा र साहित्यको विकासमा पुर्याउनुभएको योगदानको स्मरण गर्नुभयो। विद्यालयका प्राचार्य प्रदीप पौडेलले साहित्यले व्यक्तित्व विकास, सिर्जनशीलता र सामाजिक चेतनाको विकासमा महत्वपूर्ण भूमिका खेल्ने बताउनुभयो।
कार्यक्रममा साहित्यकार ईश्वर कँडेल, शान्ति शर्मा र सरला जोशीको विशेष उपस्थिति रहेको थियो। साहित्यकार कँडेलले समाज रूपान्तरणमा साहित्यको भूमिकाबारे प्रकाश पार्नुभयो भने शर्माले आदिकवि भानुभक्त आचार्यको जीवन, व्यक्तित्व र नेपाली भाषा–साहित्यमा उहाँको योगदानबारे चर्चा गर्नुभयो। साहित्यकार जोशीले आफ्ना साहित्यिक रचनाहरू प्रस्तुत गर्नुभएको थियो।
कार्यक्रममा वाल्मीकी शिक्षा सदनका ४० भन्दा बढी विद्यार्थीहरूले कविता, गजल, मुक्तक तथा अन्य साहित्यिक रचनाहरू प्रस्तुत गरेका थिए। विद्यार्थीहरूको सक्रिय सहभागिताले कार्यक्रमलाई थप आकर्षक बनाएको थियो।
आदिकवि भानुभक्त आचार्यको स्मृतिमा आयोजित उक्त कार्यक्रमले विद्यार्थीहरूमा नेपाली भाषा, साहित्य र सिर्जनात्मक लेखनप्रति रुचि अभिवृद्धि गर्नुका साथै नयाँ पुस्तालाई साहित्यप्रति प्रेरित गरेको विद्यालयले जनाएको छ।
