चितवन- कालिका भजन समूह कालिका–२, चितवनको दोस्रो साधारणसभा जेठ ९ गते सम्पन्न भएको छ। कार्यक्रम कालिका भजन समूहका अध्यक्ष भानुभक्त पौडेलको अध्यक्षता तथा कालिका–२ का वडा अध्यक्ष लक्ष्मण पौडेलज्यूको प्रमुख आतिथ्यता एवं अफिस आनन्द कुटी आश्रयदाता सुरज धितालज्यूको विशिष्ट आतिथ्यतामा सम्पन्न भएको हो।
कार्यक्रममा कृष्णकला क्षेत्रीद्वारा स्वागत मन्तव्य राखिएको थियो भने भजन मण्डलीबाट स्वागत भजन प्रस्तुत गरिएको थियो। साथै हिन्दु महासंघ कालिका नगर अध्यक्षबाट शुभकामना मन्तव्य व्यक्त गरिएको थियो।
प्रमुख अतिथि वडा अध्यक्ष लक्ष्मण पौडेलले कालिका भजन समूहलाई सामाजिक, धार्मिक, आयआर्जन तथा सीपमूलक तालिमका कार्यक्रमहरूमा समेत सहकार्य र सहयोग गर्न वडा कार्यालय सदैव तयार रहेको बताउनुभयो।
कार्यक्रममा अध्यक्ष भानुभक्त पौडेलद्वारा वार्षिक प्रतिवेदन तथा कोषाध्यक्ष डिल्लीराम चालिसेद्वारा आर्थिक प्रतिवेदन प्रस्तुत गरिएको थियो। वडा भित्र रहेका विभिन्न भजन समूहहरूको उल्लेखनीय उपस्थिति रहेको कार्यक्रममा सल्लाहकार संयोजक रेशमराज वाग्ले तथा लेखा संयोजक केशव चालिसेले सुझावसहित मन्तव्य राख्नुभएको थियो।
त्यसैगरी, आजीवन सदस्य, भक्तजन तथा विभिन्न योगदानकर्ताहरूको सम्मान समेत गरिएको थियो। कार्यक्रमको सञ्चालन सह–सचिव रामकृष्ण खनालले गर्नुभएको थियो भने माइन्युट लेखनको कार्य सचिव गोपाल प्रसाद श्रेष्ठले सम्पन्न गर्नुभएको थियो।
धार्मिक, सामाजिक तथा सांस्कृतिक एकताको सन्देश बोकेको यस कार्यक्रमले कालिका क्षेत्रमा भजन तथा आध्यात्मिक गतिविधिलाई अझ सशक्त बनाउने विश्वास लिइएको छ।
