भरतपुर- भरतपुर महानगरपालिका वडा नम्बर १० स्थित बालमन्दिर रोडमा रहेको श्री पुष्पाञ्जली अस्पतालको १७ औं वार्षिकोत्सवका अवसरमा ५७ जनाले रक्त दान गरेका छन । ती मध्ये १६ जना महिला हुन् भने १८ जना नयाँ रक्तदाता रहेका छन ।
अस्पतालका सूचना अधिकारी केदार प्रसाद सुवेदीले प्रादेशिक रक्त संचार केन्द्र भरतपुरको प्राविधिक सहयोमा ब्लड डोनर्स एसोसिएसन चितवनको सहयोगमा रक्तदान कार्यक्रम सम्पन्न गरिएको बताउनु भयो ।
कार्यक्रममा स्याउली बजार टोल विकास संस्थाका अध्यक्ष बद्री पौडेल, ब्लड डोनर्स एसोसिएसनका केन्द्रीय अध्यक्ष अर्जुन अधिकारी, जिल्ला अध्यक्ष एकराज बुर्लाकोटी, अस्पताल सञ्चालक समितिका सदस्यहरु कर्मचारी, रक्तदाता तथा पत्रकारहरुको उपस्थिति रहेको थियो ।
सो अवसरमा अस्पतालका बरिष्ठ फिजिसियन डा. भोजराज अधिकारीले रक्तदान गर्दा हुने फाइदा र क–कस्ले रक्तदान गर्न मिल्छ भन्ने बारेमा प्रष्ट्याउनु भएको थियो । रगतको चरम अभाव भएको बेला अस्पतालले रक्तदान कार्यक्रम आयोजना गरिएको बताउनु भयो । अधिकारीले रक्तदातालाई उत्प्रेरित गर्न नसकेसम्म रगतको अभाव पूर्ति गर्न नसकिने बताउनुभयो । उहाँले भन्नुभयो æविद्यालय र क्याम्पसहरुमा पाठ्यक्रममा नै रगतको महत्वको बारेमा समावेश गर्नुपर्छ ।Æ मानिस स्वस्थ रहन पनि नियमित रक्तदान गर्नुपर्ने र रक्तदान गर्दा कुनै पनि वेफाइदा नहुने उहांँको भनाई थियो ।
बि.सं. २०६६ सालमा भरतपुर १० चौबिसकोठीबाट जनरल अस्पतालको रुपमा २५ बेडको सामान्य अस्पतालबाट शुरु भएको पुष्पाञ्जली अस्पताल चौबिसकोठीमै ५० बेड क्षमताको बिशेषज्ञ अस्पतालमा रुपान्तरण हुँदै २०७९ मा बालमन्दिर रोडमा आफ्नै सुबिधा सम्पन्न भवनबाट १०० शैयाको अस्पताल संचालनमा छ । बिशिस्टिकृत र अतिबिशिस्टिकृत सेवा सहित १०० बेडको अस्पतालमा जनरल फिजिसियन, स्त्री प्रसुती तथा प्रजनन्, जनरल तथा ल्याप्रोस्कोपीक सर्जरी, न्यूरो सर्जरी, डी.एम.न्युरो फिजिसियन, नशा तथा मानसिक, यौन छाला तथा सौन्दर्य, नाक कान घाँटी, बाल तथा युवा रोग, युरोलोजी, हेमाटोलोजी, हाडजोर्नी तथा ट्रमा, दाँत मुख तथा गिजाको सम्पूर्ण परीक्षण निदान तथा उपचार हुँदै आएको छ ।
अस्पतालमा आवश्यक प्रयोगशाला, सिटि स्क्यान, फोरडी भिडियो एक्सरे, सुबिधा सम्पन्न मोडुलर शल्यक्रिया कक्ष, २४ सै घण्टा चिकित्सक सहित आकस्मिक कक्ष, आइसीयु, एन–आइसीयु, क्रिटिकल केयर, सामाजिक सेवा एकाई सहित फार्मेसी, क्यान्टिन, एम्बुलेन्स र शबगृह समेतको एकीकृत सेवा रहेका छन् । अस्पतालले चितवन आसपासका जनतालाई सेवा दिदै १२० वटा सामाजिक संघ संस्थासँग आबद्धता र सहकार्य गर्दै आएको छ ।
डा. अधिकारीले नेतृत्व गरेको यस अस्पतालमा पूर्व स्वास्थ्य मन्त्रीदेखि नेपालका ठूला व्यवसायी र चिकित्सकहरु समेतको लगानी रहेको छ ।
कार्यक्रम अस्पतालका अध्यक्ष चेतनाथ वाग्लेको अध्यक्षतामा भएको थियो भने सूचना अधिकारी सुवेदीले स्वागत गर्दै रक्तादाताको अनुभव, सामाजिक सेवाका बारेमा चर्चा गर्नुभएको थियो ।
